RSS nung madenba party tem longjemtsüla: Nitish Kumar

Patna, April 17 (Agencies): Taoba mapang socialist lenir, Ram Manohar Lohia-i Congress Party nung madenba party tem longjemtsü atema tayongzükba agütsüba ama tang JD(U) Tir tasenba aser Bihar Chief minister, Nitish Kumar-i RSS nung madenba party tem longjemtsü atema tayongzükba agütsüogo.
JD(U) Tir Kumar-i, communal force tem sentong anema aser linük telongjem meraksatsü atema BJP nung madenba party tem aser RSS nung madenba tentettem longjemtsüla, ta ashi.
Patna nung ‘Advantage Conclave-Bihar 3.0 Ummid Ki Udaan’ sentong nung jembidang  Nitish-i, “Iba linük nüburtemi tang yimtenren tensa ya kanga junga angatettsü nüngdaker. Tensa ka arudar, yimtenren sabang ana dang alitsü- kaji BJP-RSS kibong aser kaji tanüngba party tem asütsü. RSS nung madenba yimtenren party tem longjemtsüla aser mapang ka nung Lohia-i Congress nung madenertem longjemtsü atema ayongzükba ama Sangh nung madenertem indang jembitsüla,” ta ashi.
Taoba Deobarnü Nitish-i JD(U) Tir menden agizüka liasü. Pai Sharad Yadav melenzük.
2019 Lok Sabha election nung BJP nung madenba party tem longjemer tokteptsü atema Kumar-i inyaktsü aser pai, NDA aser BJP telung nung mepetmesü lir, ta ashi.
Kumar-i, “NDA nung Shiv Sena aser Akali Dal ama tejen teloktep jenjang koma lir’ar nüburtemi meteta dang lir. Parnoki BJP nung kar dang mepelar. BJP nunga karbo party dang mepelar. Lenir taintem sentoker,” ta ashi.
Jharkhand nung mezüng Chief Minister, Babulal Marandi-i linük yimtenren nung yimten tashitait ka nüngdaker ta jembiba mapang ka nung Nitish-ia National jenjang nung RSS nung madenertem longjemtsü atema ayongogo.
Hokolbarnü Marandi-i, “Linük nung yimten tashitait ka nüngdaker. Centre nung lenir asütsü atema Nitish Kumar temsüa lir,” ta jembia liasü.