RSS nung tetsür lenir anioksemtsüla: LK Advani

New Delhi, January 15 (Agencies) : Deobarnü BJP lenir tejen LK Advani-i Rashtriya Swayamsevak Sangh (RSS) dang par telok lenitsü asoshi tetsür anioksemtsüla ta ashi.
‘Prajapita Brahma Kumaris’ inyakyim ajanga tetsürtem lenisüba menden nung züngokba atema tushia ashiba mapang Advani-i, nüburtem aser RSS-i dang tebur aser tetsür tebendang melii kasa yonger nung amshitsüla, ta shisem.
“Ni tetsür timba sür leniba ibala mesükba telok mongudang. Iba inyakyim ya kanga junger. Ni iba telok den ya joko mapang talangka sendaktepa lir aser ni telok akhüm tsübur. Ni kü den ajurutepertem dang nungi angazüktsü meranger,” ta pai ashi.
“Iba mapa ya kanga tasaka mesüra temela masü. RSS nung ya tebur chanutemi parnok tanur asüba mapang nungi adener. Tetsür-a ishikabo lir, ta arishi küm 89 tain, leniri ashi.
Pai item o ya Prajapita Brahma Kumaris Ishwariya Vishwa Vidyalaya nguteter Pitashri Brahma 48buba ascension anniversary sentong nung ashi.
O jembidang pai pa Sindhi kibong ka nungi asoba tesem, Pakistan yimtiba Karachi, India nung medensemba atema sasa ashi aser India nung Sindh madenba ajanga India mabensar, ta shisem.
“Mapang kaka ni Karachi aser Sindh tesemtem India nung joko maden ta bilemtetdang kanga jashi bilemer. Ni Sindh nung tanur asüba mapang RSS nung kanga yakyaka aden,” ta paisa ashi.