RSS sentong anema Congress-i college ka mamatzü agi meshitet

Guwahati, July 22 (Agencies): Assam, Jorhat district nung college ketdangsertemi college campus nung training camp ka akatsü atema Rashtriya Swayamsevak Sangh (RSS) nem temelaba agütsüba ashishia Congress-i Honibarnü iba college ji nashi mamatzü agi meshiteta liasü.
College campus nung training camp akatsü atema Principal-i RSS nem temelaba agütsüba anema Mariani constituency nungi Congress MLA, Rupjyoti Kurmi-i iba collge kima mener longkak aitba sülen college ji temalen nungi shibanga yutsü.
RSS-i ayongzüka July 18 nü nungi tenzüka anogo 10 nü RSS training camp agidar.
Tanü Kurmi den pa pusemertem aser National Students Union of India (NSUI) züngsemtemi college tesem balala nung nashi mamatzü inna iba college ji meshitetogo. Iba sülen telok balala tsüngda rara madoktsü atema Jorhat district ketdangsertemi college temeket nung security sepaitem mapa lemzükja lir.
Kurmi-i, “Iba ya taoksatsüka lir. RSS ji shirnokar ajaki meteta lir. RSS nisungtemji komaar ajaki meteta lir. Shisaliok reju ka nung training camp akatsü atema college principal kati RSS nem temelaba agütsür ma?” ta asüngdang.
Pai ashiba agi, parnoki ketdangsertem dang RSS indang camp ji anentsütsü takhangba agütsüogo.
Congress otongdar aser taoba mapang Power Minister, Pradyut Bordoloi-ia kasa onük nung Assam nung BJP-i aniba sorkar aitsü.
“Yimtenren nung tajangzük angutsü atema BJP-i aniba sorkari ketdangsertem anishia college campus ka nung camp akatsü atema RSS nem temelaba agütsü. Iba ya taaktsü mapa ka lir,” ta Bordoloi-i ashi.
“BJP-i tamangba yimsü nung ajemdaker politics asayar. Parnoki Bangladesh nungi Hindu nunger arua aliba ajungshir. Tang parnoki school aser college tem nung RSS tangatetba ajungkettsütsü meranger. Ni Assam senso ajak dang iba ya anema ola adoktsü mepishir,” ta paisa metetdaktsü.