RSS tangatetbaji linük atema lendong lir: Digvijay Singh

New Delhi, August 13 (Agencies): RSS tangatetbaji linük atema amokmeren lir ta shia tanü Congress lenir, Digvijay Singh-i, nüburtemi longjemer iba cancer tashidak nungi linük kümzüktsüla, ta ashi.
“RSS tangatetbaji iba linük atema lendong lir. Aser iba anema tangatetba agi raratsüla. ‘Ajak atema külemi aser ajak asoshi terenlok’ (sorkar yimyim) ya tazüngla yimyim lir. Parnoki iba yimyim mapa agi meinyaker, parnok atema iba ya oren ka dang lir,” ta Congress leniri ashi.
New Delhi nung Indian Women’s Press Corps nung Ittehad-i ayongba ‘RSS and It’s Fake Nationalism’ sentong nung jembidang Rajya Sabha züngsem Singh-i iba o jembi.
Kasa sentong nung CPI national secretary, D Raja, AAP lenir, Sanjay Singh, Delhi University professor, Shamsul Islam aser Jawaharlal Nehru University Students Union tatong Tir, Shehla Rashid nungeria jembia liasü.
Singh-isa, RSS ya register masüba tentet ka lir, ta aitsü.
India ya tamangba yimsü balala, sobaliba balala aika temeyoktep aliba linük ka lir, anungji iba ya Hindu yimsü kija agi alena meyutettsü, ta pai ashi.
RSS-i nüjiso atema raraba nung shilem agi ta jembiba dak sentakba nung CPI lenir, Raja-ia, “Parnoki (RSS) linük nüjiso atema raraba nung shilem magi, saka Congress aser Communist-i shilem agia liasü. Anungji parnoki linük meimba nung asenok sayutsüngi masütsüla, ajisüaka RSS-i asenok dang nungi ang linük meimba angazüktsüla,” ta ashi.
Tawa Ato kilonser, Narendra Modi-i linük nung Dalit nunger amakba aitsüba dak sentakba nung Raja-i, Ato kilonseri o agi jembiba dang masü saka mapa agia inyaka sayua nashi kümzükertem nem temerenshi agütsütsüla, ta ashi.
Maneni AAP lenir, Sanjay Singh-i, taoba mapangtem nung Opposition-i RSS anema raraba nung tashimaitbatem lir, ta ashi.
RSS aija Singh-isa, “RSS anema jembibaji linük anema jembiba ama züngshir,” ta aitsü.
Kasa sentong nung DU professor, Shamsul Islam-ia, iba tentet (RSS) ya Muslim mesüra Khristantem dang nungibo Hindu nunger atema lendong taketba lir ta shia MP temi itemji Parliament nung jungkai adoktsütsüla, ta ashi.