RSS tongti Bhagwat-i Assam CM ajuru

Guwahati, Oct. 29 (Agencies): Hokolbar nikongdang Guwahati nung RSS tongti lenir, Mohan Bhagwat-i Assam Chief minister, Sarbananda Sonowal ajuruogo.
Iba senden nung Bhagwat aser Sonowal nati state nung tang tendak tongtibang onüktem kar nung o lemtep, ta RSS telung osang ka ajanga angazüker.
Ajisüaka RSS nung inyaker lenir katibo, “Iba senden nung yimtenren mesüra yimsüsüba indang mejembi. Ibaji akhi telemren ajuruba dang lir. RSS tongti Honibarnü yangi Dharapur nung Chaturmas (temeshi ita pezü- July-October) amongtsü atema aruba dang lir,” ta ashi.
Bhagwat yangi Raj Bhavan nung chiyungtsü aser yangi  Keshab Dham nung aliba RSS headquarters nung mejangtsü, ta paisa ashi.
State Health Minister, Himanta Biswa Sarma-ia Bhagwat ajurua liasü aser iba dak sentakba nung pai, RSS tongti dang nungi temoatsü meshitsü atema pai Bhagwat ajuru, ta ashi.
RSS telung osang ajanga ashiba agi, Bhagwat aser Sonowal na senden nung state nung BJP-i aniba sorkar jenjang indanga jembiogo.
Tamalen RSS lenirtemi National Register of Citizens (NRC) onük renema inyaktsü aser India-Bangladesh arrtsü nung atsü atsüdangtsü atema Chief Minister den jembia liasü.
Bhagwat state nung aliba mapang pai chief minister den NRC aser arrtsü atsü indang osang metetpelatsü, ta RSS-i metetdakja liasü.