RSS ya Arab lima nung Muslim Brotherhood amai lir: Rahul

London/New Delhi, Luroi/August 24 (Agencies): Europe semdangba mapang nung Congress Party Tir, Rahul Gandhi-i Ato kilonser, Narendra Modi maneni aija jembiogo.
London nung International Institute of Strategic Studies (IISS) sentong nung jembidang Rahul Gandhi-i China aser Pakistan na den Modi indang foreign policy atema tasüngdangba kaogo.
Rahul-isa, RSS-i India melenshitsütsü meranger, ta aitsü.
Tanü London nung IISS sentong nung jembidang pai, “Tanga party temibo India nunger reju balala amokbangtsü memerang. RSS tangatetbaji Arab limatem nung Muslim brotherhood tangatetba mesüka lir,” ta ashi.
Pakistan aser China na den foreign policy dak sendakba nung Rahul Gandhi-i, Ato kilonser, Narendra Modi-i External Affairs Minister indang tashi amshir, ta ashi.
Ato kilonseri External Affairs Minister indang teinyaktsü mapatem nung teka amouka inyaker, ta shia Rahul Gandhi-i, “External Affairs Minister, Sushma Swaraj-i visa agutsüba dak alaka la teinyaktsü mapa kecha mali,” ta ashi.
Doklam onük dak sendakba nung Rahul-i, tang tashi China nunger Doklam nung lir, ta ashi.
Pakistan den ken o jembitsü ano tasakba kümogo, ta shia Rahul Gandhi-i, “Pakistan den jembitsü kanga tasakba kümogo, kechiyong yangjibo tashi tulu aliba institution ka mali. Pakistan dak sendakba onük nung Ato kilonser Modi asalentong tajung mali,” ta ashi.
Right To Information dak sendakba nung Congress Tiri, nüburtem tebilemtsü ajema akumtsü atema RTI Act ya benok, ta ashi.
“Tesüiba küm 70 tashi India melenshia arudar. Yimtsüngtem aliba linük nung democratic tangatetbatem ajanga temelenshi adoker. Onoki yimjung nung melenshir. Tangatetba kaji, tajangzük ajakji India nunger ajak atema asütsü, nisung shinga mesendoktsü. Ano tanga tangatetba kaji, temelenshiji nisung ajak atema balala asütsü. Temelenshi aliba mapang nung nüburtem khuret pungbatsü atema inyakyimtemji Right to food, Right to work aser right to information liasü,” ta paisa ashi.
Alima yimtenren nung India nungeri shilem agiba dak sendakba nung Rahul-i, alima yimtenren nung India-i shilem agiogo, ta ashi.
“India-i mangatettep ajema akumtsü atema inyaker. India indang tongti tangatetbaji- nisung kari ‘India-i ajichilen asü abelen tsütsü metaloker’ ta asüngdang; telangzübaji ‘India-i indangindanga nokdaker’,” ta Rahul-i ashi.
Paisa, India nunger yimtenren inyakyimji European linüktem den mesüktepa lir, ta ashi.
“Sobaliba tsütsü onok China den sendaktepa liaka democratic inyakyimbo European linüktem den mesükteper,” ta pai ashi.
India nung Demonetisation benokba dak sendakba nung Modi-i aniba sorkar aija Congress Tiri, demonetisation ajanga India nunger rongsenkettsüng jenjang tajungba makum, ta ashi.
“India nunger rongsenkettsüng tashiji MSMEs million aika ket nung lir, parnoki mapa adokdaktsür. Kodang kati institutional inyakyim ajunga raksatsüdir aser linük nung demonetization benoktsü telemtetba agidir, ibaji ajanga India nunger tashi tuluba mekümdaktsür,” ta ashi.
Rahul-isa, demonetization ji RSS-i benok aser RBI den Finance Ministry den masüngdangtepi telemtetba agia benok, ta aitsü.
“Demonetisation shisaji RSS-i agutsü, Finance Minister aser RBI majangi inyak, aser Ato kilonser tekolak nung inoktsü,” ta paisa ashi.