RSZ-i TR Zeliang aitsür

NTAC & JCC PUSEMA NUNGITER

Dimapur, February 11 (TYO) : February 8, 2017 nü Chief Minister-i sangdong ka nung Rengma Hoho (RH)-i mezüng nungbo tetsür nem shilem 33 lemzüktsüba mulunga liasü saka tatsüka lir külen parnoki iba telemtetba agien ta ashiba atema kanga süngmanger, ta Rengma Selo Zi (RSZ)-i tanü metetdaktsüogo.

Chief Minister-i Rengma Hoho dak tai tongloktsüba angudang kanga süngmanger. Pa RH nung züngsem ka masü anungji pai iba onük jembitsü temeten mali. ULB elections magidaktsütsü ta asüba nung RH-ia pusema nungiter ta January 23, 2017 nü RH-i ‘public declaration’ agütsüba jakdang RH-i khen danga tetsür nem shilem lemzüktsüba dak sendakba indang official sangdong kecha agüja mali. Anungji, CM-i RH dak tai tongloktsüba aitsür, ta RSZ-i ashi.

“State sepaitemi lanur taküm asem tepsetba RSZ-i kukua aitsür aser tasür kibongtem den mangyim lemsateper. Tanü Nagaland state nung ajurua aliba tensa yaa state sorkar ajanga bener aruba lir aser parnoki iba tebilemtsü khuret abentsü. RSZ-i JCC aser NTAC den takokba tashi yariteptsü” ta RSZ President, Kenneth Kath aser General Secretary, Shatilo Kent nati sangdong nung shia lir.

Rengma nunger litsü nung tatidang agütsütsüpur kaketshirtem nem mokdangba mapang timtem kecha magütsütsü. Talisa kaketshirtemia JCC aser NTAC nati tarutsü putu atema bilemja inyaker ta angatettsüla aser Naga nunger shiai parnok pusema nungittsüla, ta RSZ-isa ashi.

Mokdangba mapang Rengma nunger litsü nung jangotsü aser tang nüngdakba osettem peria dang angutsü ta RSZ-isa public nem osang sangoktsüogo.