RTA-i sangdonger

Dimapur, April 24 (TYO): April 20, 2017 nü Regional Transport Authority Dimapur senden ka mena liasü, aser iba senden nung temzüng kar latetogo, ta tanü Regional Transport Authority Deputy Commissioner & Chairman-i sangdong ka ajanga metetdaktsü.
Telemtetba temzüngtem rongnung- auto rickshaw driver temi seat capacity dak tali passenger memendaktsütsüla, driver den passenger külemi amentsü memelar, iba den külemi passenger menden ajichilen insang (rod) inoktsüla, ta sangdong nung shia lir.
Ano Patkai Bridge adenerbo highway nung auto senzütsü memelar, ta sangdong ajangasa metetdaktsü.
May 1, 2017 nungi tenzüka local/zonal taxi para melenshir aser ibaji: Chumukedima nungi Kohima aser Kohima nungi Chumukedima tashi passenger shia paraji sen 200 asütsü aser Chumukedima nungi Medziphema aser Medziphema nungi Chumukedima tashi passenger shia para sen 80 asütsü.
Maneni May 1 nü nungibo nija bus operator temi- inter state/inter district aser Assam line bus temji Blue Hill station/Golaghat road nungi Inter State Bus Terminus (ISBT), Purana Bazaar-i belentsü metetdaktsür, item ozüng nung manidakra Motor vehicle Act nung aliba ama temerenshi alitsü, ta sangdong nungsa shia lir.