RTI amendment bill ya panel ka nem reprangdaktsütsüla: TMC

New Delhi, July 24 (Agencies): Bodhbarnü TMC-i, RTI amendment bill ya panel ka nem reprangdaktsütsüla, ta akhangba den külemi, sorkari bill tem mereprangshii agizüker, ta aitsü.
TMC MP aser otongdar, Derek O’Brien-i, tashishitsü aketba RTI bill agizüktsü atema sorkari Lok Sabha nung majority tashi amshi, ta aitsü.
Parliament kima osangbenertem den jembidang O’Brien-i, “RTI amendment bill ya select panel ka nem reprangshidaktsütsü atema onoki akhanger,” ta metetdaktsü.
Tanep O’Brien-i, Parliament nung bill tem mereprangshii sorkari agizükadoker, ta aitsü.
“Tanü Rajya Sabha nung agizüktsü atema Bills asem züluoka lir. Ajakji mereprangshii agizüktsü. Sorkari onok dang nungi kechi imlar ? Ola madoki alitsü asü! Parliament nung tajunglen agi Opposition shilem agitsü?,” ta pai twitter ajanga metetdaktsü.
#DontAmendRTI Bodhbarnü RajyaSabha nung agizüktsü atema sorkari RTI Bill benokra onoki mesüngmangtsü. Parliamentary democracy wazüka ayutsü atema onoki inyaktsü.Parliament committees-i kecha mereprangshii bill 14 agizükogo,” ta pai ashi.
Right to Information (Amendment) Bill, 2019 aser Protection of Children from Sexual Offences (Amendment) Bill, 2019 agizüktsü atema tanü Rajya Sabha nung züluoka ayu.
Hombarnü Lok Sabha nung Right To Information Act yanglushitsü atema sorkari bill ka agizük, ajisüaka opposition-ibo iba bill ji anema nokdaka liasü.