Rubber lu ayimertem nem tetushi agütsü

Dimapur, October 26 (TYO): Department of Land Resource, Wokha-i rubber lu ayimer yim 24 nem tetushi agüja October 25 nü District Project Office, Wokha nung rubber roller set agütsüogo.
Iba sentong nung tetushi tejaoker o jembidang Wokha Deputy Commissioner, Wezope Kenye-i, rubber lu ayimertemi mapa tajung inyakogo, ta tenüngsang agütsü.
Paisa, pei sasa ayanga litetba dang masü saka parnoki ecosystem-a tajungba kümtsüdar, ta metetdaktsü.
Ano maneni mapa meranga inyaktsü ajungshia pai zünger mapa mongui aliba lanurtem danga aluyimertem dang nungi angazüktsü, pei sasa litettsü aser lokti tesünep atema inyaktsü ayongzük.
Paisa department-i tanen makai aluyimertem nungita teyari agütsüba, iba den külemi state rongsenkettsüng ajungkettsüba atema department nema tenüngsang agütsü.
Tesülen DC, Kenye-i order letter aser rubber rollers yim 24 nem agütsü. Paisa aluyimertem dang item gol kanga apayua amshitsü mepishiba den külemi state nung tanüngba aluyimertem atema tatishitsü tajung sayutsü ajungshi.
Okila jembidang District Project Officer, Department of Land Resources, Tepunol Yore-i, state nung rubber lu ayimer timtiba alibaji Wokha district lir; iba district nung department indang rubber süngdong lakh 28 lir, ta metetdaktsü.
Paisa, ano nijatem indanga rubber süngdong lakh 5-6 shi lir, aser ibaji densemabo district nung rubber dong lakh 34 dak tema lir, ta metetdaktsü.
Paisa, department-i maneni scheme aser project balala ajanga aluyimertem nungita yaritsü, ta metetdaktsü.
Iba sentong ya Assistant Project Officer, Alemla Aier leniba nung agi, aser APC, Motsubemo-i tepela anküp o jembia liasü.