Rüjep agi kuo pongbanger school atong

Beijing, Jan 12 (Agencies) : Kuo ajak rüjep agi pongbanger tangokba China nunger tebur chanu ka noksa tawa kanga bulua prokshidagi aser iba jagi yimdak yimtsüngtem nung nüburtem kanga dang tepetzük tia nung aliba kuli sayur.
Kanga dang sükseta tetsüng agi ghonda ka jajarang pa azüngba kaketreju atonger aser iba timtem indangji nüburtemi kanga dang retreat jembidagi, ta osang ka ajanga metetdaktsü.
Southwest Yunnan province kübok primary school ka nung azüngsang tenüng agi Wang Fuman dangji ‘Rüjep Chanu’ ta tenüng jatetja jembidagi.
Chinese osang ajanga ashiba agi, tejak temeremso den kuo rüjep agi pongbanger aliba tanubosang noksaji pa azüngba school principal-i internet ajanga prokshi.
Tesayur shibai iba noksaji tangok, pai ashiba agi par kidang nungi school tsüngda kilometer pezü ser tesadangji ghonda ka dak tema jajarang atonger.
Iba noksa tangokba anogo nung temokongji minus 9 degrees Celsius liasü, ta China News Service ajanga metetdaktsü.
Aji oda süaka, tang iba noksa online ajanga prokshiba sülen temeimertemi Wang azüngba school aser kasa temeket nung aliba school ka nem sen yuan 100,000 tenla agütsüogo ta angazüker. Kaketshir shia nem sen yuan 500 (US dollar 77) lemzüktsütsü.
“Nisung tamajungertem azüoktsü atema ni police officer ka kümner,” ta Shanghai yimti nungi adokba osangbener den jembidang Wang jagi metetdaktsü.
Paisa ashiba agi, “School lenmang nung asüker saka onsara tasakbo masü.”