Ruling nung linürtem

Election mapang, tang amai yimten telok balalai nübortem rongnung nüboyima jajaba mapang election-i aiertem aser yimten lenirtemi aiben nübortem dang ‘Ruling government nung denüra, onok den denang’ ta ashiba angashir. Iba oji tanganütsüka aser tepuatsüka, idakji takoksatsüsa kecha mali saka teimla tajung agi sünga lir. Ajisüaka, ibaji kodang jungjunga bilemdangdir, asenok tanishir asütsü melen tanidaker akümbaji yimten tangatetba nung masü saka ‘ruling’ nung denüba ajanga lir ta angatettsü. Asenoki aiben yimten nung telongsu apia adener, anungji asenok aden – maden pi memeteter. Kasaji, election mapang nisung aikati repranga lir, tesülen takok angutsüla asübalen oa adener, anungji tadenbo takok angulen aden saka tangari mezüngshir, anungji tajung kecha agia matar. Asenok dak aketba item jaklatemji kodang bilemdangdir, atangji, asen agi asen nümamedangtet, taküm piyong takoklen apia tangar sülen, tangar sülen dang anidaktsü na (?) ta asensasa asen dang asüngdanhgtsüsa adoker. Yimten nung senso ka mapaji takoklen apia adenbaji masü saka tamakok ngur alidak tashi itshidakja takok ngudaktsübaji lir, süra idakji asenok lenir akümtsü. Aji oda, senso ka mapaji telongsu apia telok tuluba aser teimba alidak oa adenbaji masü saka melongsudak, azüngazünga alidak, ishika agi aika kümdakja takok ngudaktsübaji lir. Tanü asenoki asenoksasa tekolak agi teben kümogo ta jembibaji, tanga agi masü saka tangari ishika agi aika kümdaktsür longsulongsua oa alidak dena jajaba ajanga lir. Atangji, ishikati aika akümtsübaji aser azüngazünga aliba yimten telok ka longsulongsua kümdaktsütsübaji temela masü, aji ayongayonga mena lia ataloktsüba mapa ka masü, yangji tatala, nüngsen, nübo aser rongsen tenla aika dena lir. Item timtem ajakji kokteta inyak nung dang ishika agi aika küma election nunga takok angur aser ruling telok akümer. Atangji, yimten nungbo ishika – aika ta masü yimten telok nükjidong aser pei tangatetba kaka lir, anungji ‘ruling’ mesüra ‘opposition’ ta masü saka pei yimten nükjidong aser tangatetba nung nokdakra, election mapang pei vote kecha agia shingaia alizüktsü makoktsü aser ruling agia mepuatettsü aser opposition agia maoksatsütettsü. Tatishitsü agi, yimten telok kati asenok sobaliba anema nokdaker aser iba telok jagiang government akümtsü amai repranger, anungji asenokbo ruling nung adentsü mechi iba telokji yaritsü asü ? Mesüra opposition nung alitsü asüyonga asen sobaliba anemba telok denbo kenyongi madentsü ? Ruling nung adentsü kija bilema senzürtem ya pei kidang aon tajung soa maka ser tangar aon tajung soa akaba ki bushia chiyongtsü senzür amai lir. Tangar jagi jaketa chiyongdaktsütsüa akok saka iba kidangji asen kiburbo mesütettsü. Ibaji mesüka tanü asenok tangar lungsudak adenba agi kibur mekümtetter. Aji oda, tangar tanishir ser takok nguyonga oa alidak asenok oa aden nung asenok yangji kechi shilem agi atatsü ? Kasaji, tangar timtatemtsü tashi tema inyaker külen, asenok tatemtsü anasa oagi aden nung asenok shilema kechi asütsü ? Asenok ama kin aser asenok ama nisungbo, ruling asütsüba government arishia masü saka asenokiang opposition asütsüba agi ruling küma inyaktettsüla. Kasaji, asenok ama samanirtemibo pi aika adenshia alidak oagi atsüoktsübaji masü saka teimla makaba pur nisung ishika adenshia alidak oa aika kümdakja yimten yimli mesotsüla. Aji oda, asenokbo tangar takok ngua akadak oagi tamalenpurtem den tagitsü rakteptsübaji masü saka asenoki ajangzüktetba temoatsü aser tagitsütemang tangar den lemsateptetba purtem asütsüla. Ruling nung dennüba nisung aser telok asübo tanü India nung BJP telok ya mali, alemli Congress wangshidang to samar lila. Kasaji ruling nung dennüba nisung aser telok asübo küm ter tsüngda India nung Congress telok ya mali kümer lila. Asenoka parnok nungi lesson angazükdi aser yimten nungbo telongsu aser takok apia masü saka pei nükjidong aser tangatetba nung pei kija asüyonga takoksa aser timtem arema nokdakba yimsüsür aser nübor asütsü merangdi.