Rumen Radev-i Bulgaria Tir tasenba akümtsü temeten nguogo

Sofia, November 14 (Agencies): Yashi, Deobar nü agiba election nung Socialist Party yimtren telok nungi candidate, Rumen Radev-i takok ngua, Bulgaria Tir tasenba akümtsü temeten nguogo.
Taoba mitkar air force commander, General Radev ya Russia linük pusemer aser tan mezüngsüa yimtenren sabang nung tetsüng ajemoker yimsüsür ka lir.
Radev-i tan election nung vote noklang nung shilem 60 tashi ajangzüka, yimsüsütsü tashi abener GERB yimtenren telok nungi candidate, Tsetska Tsacheva madak takok angu.
Tan Radev-i election nung takok anguba sülen Bulgaria Ato Kilonser, Boyko Borisov-i yimsüsütsü menden toktsütsü shiti tanü, Hombar nü benokba osanga angazükogo.
“Radev-i tan election nung takok anguba atema kanga pelar aser pa den tepela lemsateper. Tang Bulgaria yimsüsütsü tashi abener yimtenren teloktep teloki tan election nung tamakok nguogo aser iba yongji, ni yimsüsütsü menden toktsütsü lemtetogo,” ta shia, Borisov-i yimsüsütsü menden toktsütsü shitiji benok.
Radev-i tan election nung takok anguba sülen taruba 2017 küm January ita 22 nü nungi tenzüka, par kümsük 5 yimsüsütsü menden benoktsü renema lir.
Borisov-i tan Ato Kilonser menden toktsütsü shiti benokba yong, Radev-i Tir tasenba ama, par linük nung parliamentary election sentong ayonga, Ato Kilonser tasenba shimtsü maparen tamasa inyaktsü akok.
Tan Radev-i mamangtettsüsa election nung takok anguba ajanga Russia-i Bulgaria’er yimtenren inyakyim nung teka amoktsüsa jenjang tajung angur lir.
Bulgaria ya European Union (EU) nung züngsemba linük 28 rong nung sensaktiba jenjang nung alir linük rong nung densemba linük ka lir.