Rupin Sharma temsüa lir

Nagaland sorkari tang teinyakdak Director General of Police (DGP) Rupin Sharma, IPS melentsü merangba ajanga Naga nunger tsüngda o tokteptsü tenzükogo aser talisa Opposition NPF-ibo Rupin-i police department nung ‘backdoor appointments’ memulungba ajanga sorkari pa melentsü meranger ta tai tongloktsüogo. Rupin Sharma ya Nagaland cadre nungi IPS ketdangser ka lir aser pai yaküm Yimpoksüi (November) ita nungi DGP ka ama inyaka arur. Pa meinyakdang West Bengal cadre nungi LL Doungel, IPS-i deputation inyakyim nung Yimpoksüi (November) 26, 2014 nungi küm asem atema DGP inyak aser pa melena Rupin shima liasü. Nagaland cadre nungi IPS ketdangser peria maliba agi Monupii (May) 7, 2016 nü taoba chief minister T.R. Zeliang-i Centre dang DGP inyaktsü atema Lungriading Zeliang IPS yokang ta shidi ka zülu aser iba sülen Dr. Shurhozelie Liezietsu-ia mapang tatsüka atema chief minister inyakdang Rongchii (April) 1, 2017 nü Prime Minister Narendra Modi dang T.R. Zeliang-i züluba ama Lungriading Zeliang Nagaland nung DGP inyaktsü yokang ta mepishiba shidi ka zülu. Ano, yaküm Mongputeni (October) 31 nü-a taoba CM TR Zeliang-isa Union Home Minister Rajnath Singh dang tanga cadre nungi Nagaland nung DGP inyaktsü atema IPS ketdangser ka mapa lemzükjang ta mepishia liasü. Taoba sorkar kümsük nung yamaji Centre dang mepishiba sülen taküm NDPP-i aniba PDA sorkar akümba sülen Metsüremi (March) 24 nü Chief Minister Neiphiu Rio, Metsüremi 27 nü Chief Secretary Temjen Toy aser Metsüremi 28 nü Deputy CM aser Home Minister Y Patton nungertemi Nagaland DGP Rupin Sharma melentsü atema Centre sorkar dangi shiditem zülu. Ajisüaka, shidi paikaji züluaka Y Patton-i züluba shidi social media balala nung prokshiba ajanga o atsüteptsü tenzük aser tanü tashi iba onük jembia arudar. Rio, Patton aser Toy nungertemi Centre dangi züluba shiditem nung Rupin-i IPS ketdangser ka ama küm 26 dang inyak saka DGP ka inyaktsü atema küm 28 bosa inyaktsüla ta shia lir. Parnokisa Rupin-i Cabinet Secretariat, Ministry of External Affairs aser Kosovo nung UN mission tem nung tongti süa inyak aser Nagaland nungbo pai aika ajangshia mali ta shia lir. Nagaland nung Assembly election agitsü aliba atema Rupin ji khen atema DGP inyaktsü shimba liasü ta parnokisa ashi. Asenoki item kulitemji jungjunga shisadangra Rupin Sharma melentsüsa kuli tajung kecha mangur. Ochimashiba mesüra tim mesüi inyakba ken o kar nung ajemdaker parnoki Nagaland DGP melentsü meranger süra, ibajibo Naga nunger ajaki pusema nungitla saka küm agi mabensaba, aika ajangshia mali ta asüba tatemtsütem amer pa melentsü merangba nung sorkar dak miim tebilemba ang kar ali ama temulung melemi bilemer. Rupin-i IPS ketdangser ka ama küm 26 dang inyaka arur aser shitakba agibo state ka nung DGP inyaktsü atema küm 30 inyaker IPS ketdangser ka shimtsüla ta telatetba lir süra kechiba mezüngyongi pa DGP inyaktsü shim? Iba onük nungji sorkar tejenbulen mali akümer ama angateter. Assembly election agitsü aliba atema-a süang mesüra tensa mejungi akümba atema-a süang, pa temsüa mali asübo mezüng yongi sorkari pa meshimtsüba liasü saka shim. Anungji, tang sorkari tatemtsü kar amer pa melendi ta asüba jibo tai aser kanga dang meshisadangi inyaker ama bilemer. Tanabuba nung pai Nagaland nung aika ajangshia mali ta asüba kulijia tai amai angateter, kechiyong police record ajanga ashiba agi Rupin Sharma-i Nagaland police department nung menden balala nung mapa aika inyaka aruba shia lir. 1995 küm pa ASP (PHQ) inyakba, August 1995 nungi  October 1996 tashi Niuland nung SDPO; October 1997 nungi May 1998 tashi Dimapur nung Addl SP inyak. Iba sülen pa deputation nung 1998 nungi 1999 tashi Bosnia aser Herzegovina nung UN Mission nung inyak aser September 1999 nungi 2001 tashi deputation nungsa Ministry of External Affairs nung aser July 2001 nungi 2013 tashi SP (CBI) New Delhi nung inyak. December 2003 nung pa tanaben Nagaland-i meyipa aru aser SP (PHQ) inyak, iba sülen February 2004 nungi August 2004 tashi SP (Crime), August 2004 nungi May 2005 tashi SP (CID), May 2005 nungi April 2006 tashi Sr SP (CID) aser April 2006 nungi DIGP (CID) inyaka liasü. Iba sülen pa deputation nung küm pezü atema deputy secretary cabinet secretariat (R&AW) inyak aser ano küm pezü atema director cabinet secretariat inyak aser April 2014 nung joint secretary Cabinet secretariat inyak. March 2015 nung pa Nagaland-i meyipa arur ADGP (L&R) aser DG (Prison) aser November 24, 2017 nü DGP Nagaland inyaktsü atema mapa lemzükja liasü. Police record nung aliba ajakji shitak süra, Rupin Sharma ji Nagaland DGP inyaktsü atema temsüa lir ta angajemer. Talisa osang kar angazükba agi pa ya ochishir ketdangser ka lir aser pa lenisüba kübok Nagaland police department nung temelenshi aika bener aruogo. Anungji, iba ama ochishir ketdangser yabo sorkari tetsükdaktsü mesüra meinprong kecha magütsüi dang sadoksadoka inyakdaktsütsüla.