Russia anema benokba tenokdangbaren küm 1 agi atsünglangshitsütsü: EU

Brussels, June 17 (Agencies): Russia anema benokba tenokdangba sentongtem küm ka agi talangba küma atsünglanghitsütsü renemba osang ka European Union (EU)-i tanü, Hokolbar nü metetdaktsüogo.

Russia-i Ukraine ket nungi Crimea peninsula tashiyim agi agiba den külemi, par mitkartem yoka Ukraine sorkar anemertem yariba ken o nung ajemdaker linük 28 züngsemba EU-i küm 2 tejaklen nungi tenzüka Russia anema tenokdangba sentong benok.

Par linük anema tenokdangba sentong benokba osang angazükba sülen Russia-ia EU nung züngsemba linüktem nungi tongti chiyongtsütem alizükba maparen anentsü lemtetba osang metetdakja liasü.

European Commission (EC) Tir, Jean-Claude Juncker-i Russia kübok St.Petersburg yimti nung Russia Tir, Vladimir Putin den ajurutepa senden abenba sülen anogo ka lir külen EU-i Russia anema benokba tenokdangba sentong atsülangshitsü renemba osangji tanü sangoktsür lir.

Ano külen, Juncker-i Russia semdangbaji Russia-i tashiyim agi Crimea agiba sülen pa Russia semdanger EU lenirtem rong nung temaba menden abener küma liasü.

Taoba France Tir, Nicolas Sarkozy aser Italy Ato Kilonser, Matteo Renzi na den aroki St. Petersburg yimti nung ayongba St. Petersburg Economic Forum nung Juncker-i shilem agiba ajanga EU-ia Russia den taoba mapang ama tesendaktep junga ayutsü mulungba kuli ngua liasü.

Ajisüaka, EC lenisangi Russia nung ayongba rongsenren senden nung shilem agiba atema mepelaba olen ka EU nung züngsemba linük karibo metetdaktsüogo.

Russia anema tesüsa benokba tenokdangba sentong taruba July ita tembangtsü lir aser iba yongji Russia anema benokba tenokdangba sentong maneni atsünglangshitsütsü telemtetba EU-i taruba hopta tatem küma agitsü renema lir.