Russia anema tenokdangba sentong mebenoktsü: EU

Brussels, October 18 (Agencies): Europe nung tentetba linüktemi Russia-i par mitkar tashiyim amshia, Syria nung tongpang raraba ken o nung ajemdaker par linük anema tenokdangba sentong mebenoktsü telemtetba ka agiogo.
Luxembourg nung European Foreign Minister-temi par senden ka amenba sülen Russia anema tenokdangba sentong mebenoktsü telemtetbaji agia liasü.
European Union (EU)-i Russia anema tenokdangba sentong mebenoktsü saka Syria den kidangsüa aliba linüktem aser Syria sorkar anemer teloktem den Syria’er tarutsü jenjang den sentakba onük benoka jembitsü nükjidong nung tan hoptasa senden ka ayonga amentsü renem.
Kasa senden nung Iran, Turkey aser Saudi Arabia linüktem jaoktsü renemba osang ka EU Foreign Policy lenila, Federica Mogherini-ia osang jangjashitsüogo.
“Syria nung tensa tajungba kümdakja, par linük yimtenren tebentetbaren bener arutsütsü nükjidong nung Syria den kidangsüa aliba linüktem aser par linük tentetba region nung tongti shilem agir linük lenirtem den teloktep senden ka amentsü renemogo,” ta lai ashi.
Laisa ashiba agi, tan teloktep senden amentsü renemba ya taoba mapang tenzüka aliba yimjung mapatong anema inyaker masü.
Ano külen, tan Brehostibar nü nungi tenzka, Syria nung ghonda 8 tashi tongpang merarai yimjung lidaktsütsü renemba osang ka Russia-ia tanü metetdaktsüogo.