Russia aser Israel na tsüngda tesendaktep tajungba akümer

Moscow, June 08 (Agencies): Israel Ato Kilonser, Benjamin Netanyahu-i Russia Tir, Vladimir Putin den Moscow yimtiba nung ajurutepogo.

Netanyahu aser Putin nati ita 2 tsüngda nung tan agi tanabenbuba tsüngdong ajurutepa ajanga par linük ana tsüngda tesendaktep tajungba akümba kuli angur.

Ano, Israel den tesendaktep tajungba akümba ajanga Moscow-i Middle East nung par tashi amshitsü tenzükba kulia angur lir.

Ano külen, Russia mitkartem Syria nungi anitetadoktsü osang ka Kremlin-i taküm March ita sangokjaka tanü tashi par mitkartemi Syria Tir, Bashar al-Assad aser pai aniba mitkartem pusema nungitba osang bushiteta lir.

Netanyahu-i tan Putin den ajurutepdang Russia-i Iran nunger telungpur aser Lebanon nung tentetba Hezbollah telok dang tongpang nung amshitsü osettsüset mayoktsü ajungshiogo.

Ano, Netanyahu-i taoba mapang Moscow semdangdang par linük ana tsüngda agiba tensa azüoktsü tezüngzüktep takok ngua inyakba onük lenir anati benoka liasü.

Israel aser Russia na tsüngda tesendaktep junga ayutsü tenzüker küm 25 abensaba mapang ka nung Netanyahu-i tan Moscow semdangba ajanga West-i Middle East nung tentetba linüki Russia den tesendaktep junga ayutsü nokdangtsü merangba maparen nunga tamakok anguba kuli angur.

Russia-i Ukraine nungi Crimea peninsula tashiyim agi agiba ken o nung ajemdaker West-i par linük anema tenokdangba sentongtem benokdanga Israel-i kasa ken o nung telok anaprongla pusemtsü mulungba ajanga West jashidakja liasü.

Ano, Israel-i par defense minister tasenba inyaktsü asoshi Putin den tesendaktep junga alir yimsüsür, Avigdor Lieberman tawa shimba ajanga par linük ana tsüngda maneni tesendaktep akangshitsü tenzükogo.