Russia dang ceasefire inyakyim kümzüka ayutsü ashi

Washington, September 25 (Agencies) : Germany, France, Italy, Britain, European Union (EU) aser US linüktem nung Foreign Minister temi Russia dang Syria nung ceasefire inyakyim mulunga aliba sayua aji kümzüka ayutsü ashi.
Fletcher School of Law & Diplomacy, Medford, Massachusetts nung senden ka amenba sülen US Secretary of State John Kerry aser European linüktem nung Secretary temi, Syria nung nüngdakba pur tetsükdaktsü melii yaritsü aser UN inyakyim sadema inyaktettsü atema Russia-i nungittsü nüngdak, ta sangdong ka ajanga ashiba EFE osang ajanga metetdaktsü.
“Russia-i ceasefire agizüker ta sayutetba ajanga meimlaba mera tajung aika agitettsü,” ta linük tanishirtemi sangdong nungji shia lir.
Russia-i teti dangbo alimai ashiba mangai parnok mulungka nung dang inyaktsü maongka mangutsü, ta lenirtem metetdaktsüogo.
UN Security Council-i lenmang tasen aser rongdak telemtetba kar agia Syria nung makmakshimakba bentettsü merangtsüla, balakata Aleppo yimti nung maneni tapoktsü poklokja lendong agütsüba reprangshitsüla, ta kasa sangdong nung shia lir.
Aleppo anüdoklen Syria sorkar anemertem Russia-i yariba agi ceasefire magizüker aser maneni chemical weapon tem amshir aser iba maparen ajanga Russia-i telemtetba tajung akatsü mulunger ta ashiba den meputeper, ta sangdong nungji lir.
Syria nung tan hopta to nüburtem atema bendanga agüja inyaker telok oya-a aliba garitem nung tapoktsü tesashi pokloktsüba aitsüogo aser Bashar al-Assad teloki pei nüburtem dak maneni tapoktsü pokloktsüba anendaktsütsü atema Moscow dang yimjung bener arutsü atema mera agitsüla, ta linertemi metetdaktsü.
Syria, Iraq, France, Germany, Italy aser Britain nungi Islamic State (IS) telok meshimeshia samatsütsü nangzükba inyaktsü ta nenshia ashiba mapang EU-i Russia dang parnoki nangzükba ama inyakang ta ashi.
Mezünga Russia aser US nati Syria nung ceasefire inyakyim raksaba taoba Hombarnü tashi atsütepogo.