Russia den Aleppo atema jembitsü: Cavusoglu

Ankara, December 13 (Agencies): Turkey linüki Russia densema, tongtipang linüktem den Syria kübok Aleppo yimti den sentakba onük benoka jembitsü sentong renemba olen ka Turkey Foreign Minister, Mevlut Cavusoglu-i tanü, Mongolbar nü metetdaktsüogo.
“Aleppo yimti nung tongpang raraba anenja, yimjung alitsü rongdaka nungdaka lir,” ta shia, Aleppo nung timtem toushi jenti ajurua alir nüburtem taküm kümzüka anitettsü aser parnok nem nungdakba teyari agütsütsü lenmang lapoktsütsü atema Russia densema, Syria tongpang nung tongti shilem agir linüktem den jembiteptsü bilemba olenji pai metetdaktsü.
Par linük semdangsang, Czech Republic Foreign Minister, Lubomír Zaorálek den aroki Ankara yimtiba nung osangbener den ajurutepdang Cavusoglu-i tanü iba olenji sangoktsü.
Ajisüaka, Aleppo yimti nung tongpang rarabaren anentsütsü atema benokba onük magizüktsü lemtetba osang ka Russia Foreign Minister, Sergei Lavrov-ia tanü metetdakja liasü.
“Syria kübok Aleppo yimti nung tangsa tang yimjung mapang lidaktsütsüji tamashi,” ta shia, nübur taküm kümzüka anitettsü lenmang bushiteta ayuba sülen ang iba yimti nung tongpang rarabaren anentsütsü atema jembitsü bilemba olen ka pai shisem.