Russia den tesendaktep raksatsü tebilemba mali: Erdogan

Ankara, November 25 (Agencies): Russia den tesendaktep raksatsü tebilemba maliba olen ka Turkey Tir, Tayyip Erdogan-i tanü Bodbar nü metetdaktsüogo.

Turkey mitkar tayimtsü 2-i Syria tsütsülen nungi arua par lushi temalen ayimba Russia tayimtsü ka anüng tom nungi yashi Mongolbar nü kazüka yoka liasü.

Ajisüaka, “Pei linük kümzüka ayutsü nükjidong nung yashi Russia tayimtsüji anüng tom nung kazüka yok,” ta shia, Russia den tesendaktep raksatsü aser iba ken o nung ajemdaker par linük ana tsüngda tongpang raratsü tebilemba maliba olen ka Erdogan-i tanü metetdaktsü.

Russia-ia Turkey den tongpang raratsü sentong mali ta Russia Tir, Vladimir Putin-ia metetdaktsüogo.

“Ozü mitkar tayimtsüi Turkey linük amakmerentsüsa kecha meinyak. Ozü tayimtsüi Syria nung tentetba Islamic State (IS) kiralongrar telok anema raratsü maparen inyakdang tayimtsüji anüng tom nungi kazüka yok,” ta pai metetdaktsü.

Ajisüaka, yashi par tayimtsü anüng tom nungi kazüka yokba atema jashiba metetdakja par nüburtem Turkey mesemdangtsü tetuyuba ka pa agütsüogo.

Russia-i par nüburtem Turkey mesemdangdaktsüba ajanga Turkey-i rongsenren takoksa tulu angutsü kechiyong Russia nübur aser raliwalirtemi semdangba ajanga Turkey-i senotsü tajangzük tulu angur.

Ano külen, IS telok madak tokok ngua raratsü nükjidong nung Russia aser Turkey nati yashi tayimtsü anüng tom nungi kazüka yokba ken o nung ajemdaker tensa tamajungba mekümdaktsütsü tajungshiba olen ka US Tir, Barack Obama aser France Tir, Francois Hollande natia metetdaktsüogo.