Russia-i Aleppo ken o nung US den angatetteptsü ajungshir: Kerry

France yimtiba, Paris nung amenba Syria senden nung US Secretary of State, John Kerry (Abelen, 2 buba) aser France Foreign Minister, Jean Marc Ayrault (Achijilen, 2 buba) nati shilem agiba noksa nung angur. (Paris, December 10)

Paris, December 10 (Agencies): Syria kübok Aleppo yimti den sentakba ken o nung Russia-i lenji oa, par United States (US) den angatetteptsü tajungshiba olen ka US Secretary of State, John Kerry-i tanü, Honibar nü sangoktsüogo.
Alima teloktep mitkartemi nungitba Syria mitkartemi taoba hopta 2 tejaklen nungi tenzüka, par mitkar mapatong kanga sashia tenzükba sülen Aleppo yimti nungi sorkar anemer timbaka takok ngua makdokba mapang ka nung Kerry-i tan iba tajungshiba olenji sangoktsür lir.
Syria sorkar anemertemi 2012 küm nungi tenzüka, Syria ajunga nung nütsüng yongsük timtiba aliba Aleppo yimti anüdoklen densemba tesemtem amokbanga aruba sülen sorkar mitkartemi parnok tan takok ngua makdoktsü tenzüker lir.
“Syria mitkartemi Aleppo yimti sorkar anemer ket nungi tanaben agiba ajanga Syria tongpang rarabaren melenshitsütsü,” ta Syria Tir, Bashar al-Assad-ia tan Brehostibar nü sangokja liasü.
France, Britain, Turkey aser Saudi Arabia densema, Assad anemer linük nungi lenirtem den France yimtiba, Paris nung senden ka amendang Kerry-i tanü tajungshiba olenji sangoktsü.
Pai iba senden nung shilem agiba sülen Switzerland kübok Geneva bushia ao, idakji Russia lenirtem den ajurutepa, Aleppo yimti den sentakba senden maneni amentsü sentong lir.
“Syria nung alir tai maketba nübur taküm kümzüktsü lenmang bushitsü nükjidong nung Geneva nung senden amentsü jatepa lir. Russia aser par linüki pusema nungitba Assad aser pai aniba Syria sorkari tang temaba jenjang ngua lir saka parnoki lenji arua jembiteptsü ajungshir,” ta Kerry-i nenshia ashi.
Russia aser US lenirtemi taoba mapanga Aleppo yimti anüdoklen alir nüburtem nem par yimti toktsütsü maongka agütsütsü aser iba tesem nung timtem toushi ajurua alir nüburtem nem nungdakba teyari agütsütsü onük benoka jembiba osang angazükogo.