Beirut, January 11 (Agencies): Russia nungeri Syria, Aleppo province anüng nungi amakdang yangji aliba kaketreju ka nung kongshia tesayur ka den tanur 8 süogo, ta asadangertemi ashi.
Syrian Observatory for Human Rights temi, Anjara jila amakba mapang tajemba agi nisung 20 yiru aser parnok ajakji kaketshir tanurtem aser tesayurtem lir.
Parnoki ashiba agi, sorkar aser parnok anemertem yashi nungi tayimtsü ajanga kanga sashia rarardar.
Aleppo yimti nung sorkar-i amokbanga aliba tesem nung parnok anemertemi amakba mapang tanur asem süogo, ta British nung aliba tensa asadangertemi ashi.
2012 küm nungi Aleppo yimti anüolen sorkar aser anüdoklen parnok anemertemi ta amokbangtepa lir.
Anüdoklenji sorkar sepaitemi teti nungoka ia mita operation agir aser parnok anemertemi anülulen rocket sa kahloktsür.
Russia ya Syria Tir Bashar al-Assad den tesendaktep kanga junga aliba linük ka lir aser parnoki 2015 September ita nungi tenzüka sorkar pusema anüng nungi tayimtsü amshia amakba maparen tenzük.
Islamic State (IS) aser tanga kiralongrar telok samatsütsü nükjidong nung iba mapa inyaker, ta Russia-i ashi ajisüaka parnoki amakdang asüba shilem asemsü lemer shilem kabo civilian tem lir, ta Syrian Observatory for Human Rights temi ashi.
British nung aliba tensa asadangertemi ashiba agi, Russia nungeri September ita 30, 2015 nü nungi tenzüka anüng nungi maka arudang, taoba December nung Russia nungeri amakba mapang nisung 2,300 dak tema asü aser item tasürtem rongnung civilian 792 tashi densema liasü.
Syria nung 2011 March nungi tenzüka rara arudang tang tashi nung nisung 260,000 süogo.
You must be logged in to post a comment Login