Russia-i Assad jenjang tajungba mekümdaktsütsüla: Stoltenberg

Brussels, September 24 (Agencies): Russia-i par mitkar aser tongpang nung amshitsü osettsüset Syria-i yoka par mitkar tashi tali itshitsü inyakba atema tebilemtsü akaba olen ka North Atlantic Treaty Organization (NATO) Secretary-General, Jens Stoltenberg-i tanü Brehostibar nü metetdaktsüogo.
“Russia-i par mitkar aser tongpang osettsüset Syria-i yokba ajanga par alizüng kechi ibaji jangja jangja sayur. Ajisüaka, par linüki yamaji inyakba ajanga tang Syria nung lendong kanga sashia atalokdaktsüba Islamic State (IS) kiralongrar telok anema rarabaren nung tongti shilem agitsü ajungshir,” ta Stoltenberg-i tanü Brussels yimti nung osangbener den ajurutepdang metetdaktsü.
Ano, Russia-i par mitkartem yokba ajanga par linüki mapang talangka nungi pusemba Syria Tir, Bashar al-Assad jenjang tajungba mekümdaktsütsüla ta pai ashi.
Assad-i aniba sorkar mitkartemi sorkar anemertem raraba tongpang nung aiben tamakok angutsü tenzükba sülen Russia-i par linük yangluba tongpang nung amshitsütsü osettsüset tajung agüja yariba ajanga Syria sorkar mitkartem indang jenjang tajungba kümdaktsütsü tenzükba osang bushiteta lir.
Russia-i Syria tzüyimkümlen, Tartus yimti nung tentetba tzüyim mitkar tesepa tali tashi itshitsütsü tenzükba den külemi, Syria anülulentip tsütsü Latakia nunga par mitkar tesep tasen tentetba osanga bushiteta lir.
Ajisüaka, Russia-i yamaji inyakba ajanga NATO densema alima tashi abenba linüktemi tang tebilemtsü khuret benoktsü tenzüka lir.
“Russia-i Syria nung par mitkar tashi tali itshitsüba ajanga Assad jenjang tajungba kümdaktsütsü masü saka IS anema teraradak US-i aniba teloktep mitkartem den külemi lungjemer IS samatsütsü tongpang nung tongti shilem agitsüla,” ta Stoltenberg-i nenshia ashi.
Ano külen, US aser Russia nati Syria nung yimjung bener arutsütsü asoshi tawa sentaktepshiba atema pelaba olen ka metetdaktsüba den külemi, Russia-i par mitkartem nem Assad-i aniba mitkartem pusemdaktsüba ajanga tai maketba Syria nübur jenti tepsettsü tetsübo aliba olen ka pai tanü lemsatep.
“Assad-i aniba sorkar mitkartem yariba ajanga IS madak takok mongutetba den külemi, yamaji inyakba ajanga Syria nung adokba mangatettep ken o-a mebentettsütettsü,” ta Stoltenberg-i tanü tebilemtsü kaa ashi.