Russia-i benokba onük magizüker: CAS

Lausanne, July 21 (Agencies): Russia-i par asayartem nem Rio Olympics nung shilem agitsü temeten agütsütsü asoshi benokba onük magizüktsü lemtetba osang ka Court of Arbitration for Sport (CAS)-i tanü, Brehostibar nü metetdaktsüogo.
“Russian Olympic Committee (ROC)-i par asayar 68 tashi nem Olympics nung shilem agitsü temeten agütsütsü asoshi benokba onük magizüktsü lemtetogo,” ta CAS-i tanü sangdong ka ajanga sangoktsü.
CAS-i tan agiba telemtetba dak ajemdaker International Olympic Committee (IOC)-ia Olympics tetoktepba ajunga nung Russia asayartem nem shilem magidaktsütsü telemtetba tan hopta agitsü akok.
Ozüng alema tashi tali itshitsü mozümora achiba nung ajemdaker tan ken o tulu adokba ajanga alimar saisapongtsüren tensa mejungi kümdakja lir aser iba ken o ajanga Olympic tentet nung telemsa adoktsü akok ta Russia Tir, Vladimir Putin-ia metetdaktsüogo.
Sorkari ajungmesoa Russia’er athlete-temi ozüng alema mozümora achiba osang World Anti-Doping Agency (WADA)-i tentetba independent commission-i bushitetba sülen alima ajunga nung athletics tetoktepba ketdang asür tentet tematiba, IAAF-i Russia’er track aser field asayartem international jenjang nung ayongba asayamong ka nung dang shilem magidaktsütsü tenokdangba yaküm, 2015 küm November ita benoka liasü.
Ano, 2014 Sochi Winter Olympics nunga Russia sorkari nungita, par asayartemi ozüng alema mozümora achiba osang bushitetba osang ka WADA-isa tan Hombar nü sangoktsüba sülen IOC-i Russia asayartem Rio Olympics tetoktepba ka nung danga shilem magidaktsüi nokdangtsü telemtetba agitsü asoshi renemshitsü tenzüka lir.