Russia-i Central Asia nung military tashi itshitsü: Defence Ministry

Moscow, August 19 (Agencies) : Central Asia nung tensa petsaprong manenba ajanga Russia-i parnok military tashi itshitsü lemtetogo, ta Russian Defence Ministry-i ashi.
“Central Asia tensa tajungba makümer. Sorkar kübok aliba sepaitem, Taliban, aser ISIS teloktem tsüngda rara manener,” ta Hokolbarnü military department nung sentong ka agiba mapang Russian Defence Minister Sergei Shoigu-i ashi.
Central Asia tesemtemji sentong ajak asoshi nüngdakba tamendaktak tongti tesem lir, anungji Russia indang ‘Central Military District’-i Central Asia linüktem nung aliba armed force tem den lokteper iba tesem nung Russia jenjang tashi itshitsü asoshi mapa balaka nendaka inyaker, ta kilonseri ashi.
Taküm anünga aliba küm tesadang piyong Russia, Kyrgyzstan, Tajikistan aser Uzbekistan linüktem lokteper raratsü atema renemshia exercise agitsü, ta paisa ashi.
Central Military District ya Russian Federation indang Armed Forces tem meyong ‘operational strategic commands’ pezü rongnung ka lir. Iba ya Yekaterinburg, central Russia nung amenoka lir aser Central Military District yagi Central Asia den Russia indang military nüngdak maparen ajak inyaker.