Russia-i democracy benshiba linük ajunga amokmerener: Poroshenko

Kiev, September 11 (Agencies): Russia-ia tashiyim agi Crimea Ukraine ket nungi agiba aser Ukraine sorkar anemer nem tongpang nung amshitsü osettsüset agüja yariba ajanga par linüki alima ajunga nung democracy yimsüsütsü benshiba linüktem anema inyaker ta Ukraine Tir, Petro Poroshenko-i tanü Hokolbar nü sangoktsüogo.

Ano, Russia-i Ukraine sorkar aser Russia pusemba Ukraine sorkar anemer na tsüngda taküm February ita agiba yimjung tezüngzüktep raksatsütsüsa mapa inyakra, West linüktemi Russia anema shishilembatsü aser iba amala tenokdangba sentongtem tesashiba benoktsü tajungshiba olen ka pai metetdaktsü.

“Russia-i tashiyim amshia Ukraine sorkar indang pei madak peisasa yimsü asütsü temeten anemba ajanga par linüki alima ajunga nung democracy yimsüsütsü yimya benshiba linüktem amokmerener,” ta arsihi küm 49 tain Poroshenko-i shisem.

Ukraine sorkar aser sorkar anemertemi Belarus yimtiba, Minsk nung taküm February ita agiba yimjung tezüngzüktep tajungba küma tanaben tan September ita 1 nü agishiba sülen, telok anapronglai par tongpang rarabaren kanga ajema akümba osanga bushiteta lir.

Iba tezüngzüktep agiba ajanga Europe nung küm 10 shi tsüngda nung adokba lendong tesashitiba anentstütsü aser Russia pusemba Ukraine region 2- Lugansk o Dontesk na nem Ukraine temzüng kübok yimsüsütsü tashi tuluba agütsütsü renema lir.

“Russia-i Minsk nung agiba tezüngzüktep meraksatsütsü asoshi West-i par linük anema benokba tenokdangba sentongtem magienba den külemi, nungdak dang adokra, iba den tesashiba tenokdangba sentongtem par linük anema benoktsü ta Russia nem angatetdaktsütsüla,” ta Poroshenko-i nenshia ashi.

Russia-i alima nem memetetdaktsüi par mitkar züngsem 8000 shi arrtsü adena Ukraine-i yokba den külemi, Ukraine sorkar anemer nisung 40,000 nem rocket aser tank densema tongpang nung amshitsü tongti osettsüset agüja yarir ta shia, Ukraine-i Russia aija lir.

Ajisüaka, par linüki yamaji meinyak ta Russia Tir, Vladimir Putin-ia metetdakja lir.