Moscow, March 18 (Agencies): Russia-i Islamic State (IS) ta ajaba kiralongrar telok tetsüti anema raraba Kurd kintemi tetentba Peshmerga sepaitem nem tongpang nung amshitsü osettsüset yokba osang ka tanü, Hokolbar nü metetdaktsüogo.
“Tayimtsü dak katetba anti-aircraft autocannons 5 aser injang 20,0000 densemba tongpang osettemji tan Hombar nü tongtsüogo,” ta Irbil nung tentetba Russian Consul General indang attaché, Artem Grigoryan-i osang jangjashitsü.
Russia’er Iraq ambassador, Ilya Morgunov aser Kurdish Tir, Masoud Barzani nati tsüngdong ajurutepa par telok ana tsüngda tesendaktep tajung ayutsü aser Peshmerga sepaitem nem mitkar teyari agütsütsü nangzükteper anogo ka lir külen Russia-i Peshmerga sepaitem nem tongpang osettsüsetji yokba osanga jangjaogo.
“Russia-i Iraq kübok Kurdistan region maneni nungita yaritsü aser kiralongrartem anema rarabaren nung yaritepa Peshmerga sepaitem nem nungdakba tongpang osettsüset agütsütsü asoshi Morgunov-i nangzükogo,” ta Barzani-ia metetdakja liasü.
US aser Germany na densema, linük aikati West-i nungita yariba Peshmerga sepaitem nem taoba mapanga mitkar teyari agütsüba osang bushiteta lir.
Ajisüaka, “Kurd kini tongpang oset tulu anguba ajanga parnoki Iraq nungi sadanga nüchiso ngua linük tasen ka tentettsü merangtsü akok,” ta shia, Peshmerga sepaitem nem tongpang oset tulu agütsütsü maparen ya Iraq sorkari nokdangtsü merangba osang angazükogo.
“Kurdistan region asoshi yokba tongpang nung amshitsü osettsüset ajunga Iraq sorkar ajanga aotsüla,” ta shia, Baghdad-i taoba mapang yokba tongpang osettsüsettema Kurd kin ket metongdaktsüi nokdangba osang bushitetogo.
Ajisüaka, Iraq sorkari melaba sülen ang Russia-i tan Peshmerga sepaitem nem tongpang osettsüset agütsüba osang ka Kurdistan region nungi Russia-i yokba ketdangser, Aso Jangi Burhan-i metetdaktsüogo.
“Iraq sorkar nungi temelaba agiba sülen Russia tayimtsütemi Irbil nung anenzüka tongpang osettsüsetji Peshmerga sepai ket tongtsüogo,” ta pai osang jangjashitsü.
Paisa ashiba agi, Russia-i taoba mapanga Kurd kin nem tan amala tongpang osettsüset agüja yariogo.
You must be logged in to post a comment Login