Russia-i mitkar tashi amshia IS anema raratsü renema mali: Putin

 

Vladivostok, September 04 (Agencies): Russia-i mitkar tashi amshia Islamic State (IS) ta ajaba kiralongrar telok den raratsü sentong maliba osang ka Russia Tir, Vladimir Putin-i tanü Hokolbar nü metetdaktsüogo.

“Ozü linüki IS samatsütsü lenmang jenti tebushidak lir saka ozü mitkar tashi amshia par telok den raratsü sentongbo tanü tashi renema mali,” ta pai ashi.

“Ozü mitkartem yoka IS anema raratsü onük benoka jembitsü mapang agi ango matong. Ajisüaka, IS den sentakba khuret ajurua aliba Syria linük nem tongpang nung amshitsü osettsüset agütsüba den külemi, par mitkartem nem tongpang raratsü terenemshiba agüja ozü linüki yaridagi,” ta Putin-i osang jangjashitsü.

Russia anüdoklen tentetba Vladivostok yimti nung tanü ayongba Eastern Economic Forum senden nung o jembia shilem agidang Putin-i iba olenji metetdaktsü.

Russia mitkartemi Syria tonga oa idakji tentetba IS telok anema tongpang raraba osang ka US-i yashi Brehostibar nü sangoktsüba sülen Putin-i tanü iba olenji metetdaktsür lir.

Paisa ashiba agi, US Tir, Barack Obama densema, Turkey, Saudi Arabia aser Jordan nunger lenirtem den IS telok anema raratsü atema teloktep mitkar telok ka tentettsü onük benoka jembitsü tenzüka lir.

Ano külen, Syria Tir, Bashar al-Assad-i tekaraba mapang nung parliamentary election sentong agia Syria sorkar anemertem den külemi lungjemer Syria sorkar tasen tentettsü mulunga aliba osang ka Putin-i tanü metetdaktsüogo.