Russia-i par miktartem Ukraine nungi anitettsüla: Stoltenberg

Brussels, June 15 (Agencies): Russia-i par mitkar aser tongang nung amshitsü osettsüset ajunga Ukraine nungi agientsü takhangba olen ka North Atlantic Treaty Organization (NATO) lenisang, Jens Stoltenberg-i tanü, Bodbar nü metetdaktsüogo.

“Russia-i par mitkar aser tongpang osettsüset ajunga Ukraine nungi agienba den külemi, par linüki Ukraine sorkar anemertem pusema nungitba maparena anentsüla,” ta Stoltenberg-i NATO defense minister-tem den Brussels yimti nung senden ka amenba sülen osangbener den ajurutepdang metetdaktsü.

“US-i aniba NATO mitkartemi Ukraine maneni pusema nungitsü renema lir,” ta shia, Russia-i Ukraine ket nungi Crimea peninsula tashiyim agi agiba maparenji ozüng alema inyakba maparen lir aser iba yongji, NATO-i iba maparenji kodanga magizüktsü ta pai sangoktsü.

“Russia-i par mitkar tashi amshia, tashiyim inyakba nem telangzüba agüja, NATO-ia Ukraine sorkar taoba mapang nungi tang tesashiba yaritsü tenzükogo,” ta paisa shisem.

Paisa ashiba agi, Moscow-i tongpang nung amshitsü osettsüset agütsüba, par mitkartem Ukraine arrtsüleni yokba aser Crimea nung par mitkar tesep tentetba densema, Ukraine sorkar anemertem tangasa pusema yariba kuli jenti ngua lir.