Russia-i Qatar onük atema yariteptsü mulunga lir

Moscow, June 10 (Agencies): Qatar aser Gulf nung par kidanger linüktem tsüngda angatetteptsü atema olemtep alitsüla aser iba nung par linükia yariteptsü, ta Russia foreign minister-i Qatar dang ashi.
“Onoki iba tensa atema kanga tebilemtsü abener” ta Moscow nung Sergei Lavrov-i Qatar Foreign Minister Sheikh Mohammed bin Abdulrahman Al-Thani dang ashi.
“Onok den yaritepba linüktem tsüngda yamai tensa mejungi akümba atema onok mepelar. Onoki olemtep ajanga angatettepdaktsünür” ta Sergei-isa mepishia ashi.
Kidanger Arab linüktem den tesentaktep mejungi akümba sülen Qatar-i tangar dang nungi teyari meshir.
Qatar-i Muslim Brotherhood movement aser Al-Jazeera network yarir ta aija linük pezü- Bahrain, Egypt, Saudi Arabia aser United Arab Emirates-i tesentaktep pila.
Russia-i akokba tashi yariteptsü aser iba tensa süngjemdaktsütsü atema mulunga lir. Kiralongraba anema raratsü atema telongjem nüngdaker, ta Russian Foreign Minister-isa ashi.
Qatar-i parnok aitsüba onüktem magizüker aser Al- Thani-i ashiba agi, par linük anema tenokdangba agütsübaji ozüng alema inyakba mapa ka lir.
Iba onük ya Russian hackers ajanga adokdaktsütsü ta osang kar ajanga ashir saka Russia-i ibaji tiyazü aser kuli kecha mali ta ashir.