Russia-i Syria nung IS anema rara nung telungpurtem yaritsü akok

Moscow, October 24 (Agencies) : Russia-i Syria nung Islamic State anema rara nung parnok Air Force-i Free Syrian Army yaritsü mulunga lir, ta Honibarnü Foreign Minister Sergei Lavrov-i metetdaktsü.
Free Syrian Army yagi tir Bashar al-Assad anema rarar aser iba opposition telok ya West linüktemi pusema nungiter.
“Onoki anüng nungi Free Syrian Army dena linük atema noktakba teloktem yaritsü mulunga lir” ta Lavrov-i ashi.
Lavrov aser US lennir John Kerry na yashi Vienna nung ajurutepa senden ka agi aser iba tenati Syria nung 2011 nungi rara adoka nisung 250,000 den timba samaba khuret atema külemi yaritsü onük benoka jembiba sülen Lavrov-i tanü iba osang tasen metetdaktsü.
Vienna senden nung Turkey aser Saudi Arabia linüktem nungi foreign minister tem kar dena liasü aser iba senden agiba sülen Kerry-i osangbenertem dang temelenshi kar angutsü teimla lir ta ashi.
Tanü Lavrov-i jembizüka yokba o ajanga Russia-i Syria nung mapa inyakba nükjidong melenshir ama ajiteter.
Taoba Mongulbarnü Russia Tir Vladimir Putin-i alima ajak aoksadakja Kremlin nung Assad jaoka senden ka agi.
Senden tembangba sülen Putin-i osangbener den jembidang ashiba agi, Assad tena Russia-i telungpur teloktem pusema nungittsü akok ta onük jembiogo.
“Ni pa dang kiralongrar IS anema raratsü atema Syrian opposition ajuru nung naii kecha koma bilemla. Onoki Syrian Army yariba ama item telungpur teloktema yari nung nai kechi shila ta ni Syria dang asüngdang” ta Putin-i osangbener dang ashi.
“Idangji pai, ‘Nibo iba nung mashishila’ ta langzü” ta Putin-isa shisem.
“Onoki tang iba onük atema bilemer aser tenangzükbatem mapa küma inyaktsü meranger” ta paisa metetdaktsü.
Russia-i Syria nung kiralongrartem anema anüng nungi raraba nung West-i pusema nungitba telungpur teloktem dak tenük yoka inyaker ta West linüktemi aitsür.