Russia-i Syria nung kanga aibelena inyaker: Tayyip Erdogan

Istanbul, October 04 (Agencies): Russia-i par mitkar tayimtsütem amshia Syria nung amakba maparen balala inyakba ajanga par linüki kanga dang aibelentsü tenzükba olen ka Turkey Tir, Recep Erdogan-i tanü Deobar nü metetdaktsüogo.
“Russia-i Syria nung par mitkar tesep tenteta Syria Tir, Bashar al-Assad-i aniba sorkar anemertem anema amaktsü maparen ya khen yongi magizüktetba maparen ka lir. Par Russia-i yamaji inyakba ajanga kanga dang aibelentsü tenzüker lir,” ta Erdogan-i tanü France bushia aoba jakdang osangbener dang metetdaktsü.
Paisa ashiba agi, par Turkey aser Russia na tsüngda tesendaktep kanga junga liaka, Russia-i alima teloktep mitkartem den yaritepa, tang Syria nung lendong kanga sashia atalokdaktsüba Islamic State (IS) kiralongrartem anema raratsü melena Syria sorkar anemertem amaktsü tenzükba ajanga par Turkey linük densema, alima ajungai par Russia linük sendoktsüsa akümtsü.
Assad-i aniba sorkar pusemba Russia linük aser Assad-i Tir menden toktsüba ajanga dang Syria nung tensa ajungtsü ta ashiba Turkey linük na indang Syria den sentakba tangatetbaren khen yongi balala lir.
“Russia-i dang masü saka Iran linüka Assad pusema Syria sorkar anemertem den raraba kuli bushiteta lir,” ta Erdogan-i tanü aija ashi.
Taoba hopta nungi tenzüka Syria nung amaktsü maparen tenzükba sülen par mitkar tayimtsütemi IS telok anema dang rarar ta Russia-ia par metentsüba olen ka metetdaktsü.
Ajisüaka, Russia-i IS telok amaktsü dak atemer Syria sorkar anemertem amakba kuli bushitetba osang ka Turkey densema par linük pusemba West linüktemi metetdaktsüogo.