Russia-i Syria nung tentetba IS samatsütsü inyaker: Medvedev

Moscow, October 17 (Agencies): Russia-i Syria Tir, Bashar al-Assad jenjang tajungba kümdaktsüsü nükjidong nung masü saka Syria nung tentetba Islamic State (IS) kiralongrar telok samatsütsü nükjidong nung par mitkartemi Syria nung mitkar sentong tenzükba olen ka Russia Ato Kilonser, Dmitry Medvedev-i tanü Honibar nü metetdaktsüogo.
Russia-i par mitkar züngsem aser tongpang nung amshitsü osettsüset yoka taoba September ita nungi tenzüka Syria nung raraba tongpang nung tongti shilem agitsü tenzüka lir.
Ajisüaka, par mitkar tayimtsütemi IS teloki tentetba teseptem masü saka Assad anemertem anema amakba maparen inyakba ajanga US densema, West linüktemi Russia aija lir.
“Russia, US aser alima tashi abenba linüktemi Syria nung tashi tait sorkar tentetja par linük densemba Middle East tesem nung yimji yimjung lidaktsütsü maparen nung tongti shilem agitsü nungdaka lir. Iba alizüngji yimtenren tebentetbaren bener arutsüba ajanga asangsang nung ajangzüktettsü,” ta Medvedev-i metetdaktsü.
“Shingaia IS telok nem Syria indang yimsüsütsü tashi agütsütsü bilema mali anungji, IS samatsüba ajanga dang Syria nung yimji yimjung tia bener arutsütettsü,” ta pai ashi.
Ano, Assad nem maneni Syria lenisütsü tashi agütsütsüji tim asü ta asüngdang, “Assad nem Syria lenistsü menden bendaktsütsüji tim masü. Syria lenisang shimtsü telemtetbaji Syria nüburtemi dang agitettsü. Ajisüaka, par lenir tasenba meshim tashibo Assad-ji Syria lenisang ta züngoktsüsa akümer,” ta Medvedev-i langzü.
Russia mitkartemi taoba September ita 30 nü nungi tenzüka Syria nung tongpang raratsü tenzüker tanü tashi nung tesem 456 tashi amakba osang bushiteta lir.