Russia-i Syria nung tongpang raraba maparen aitsür: Stoltenberg

Brussels, October 08 (Agencies): Russia-i par miktar züngsem aser tayimtsütem yoka Syria nung tongpang raradaktsüba maparen aitsüba olen ka North Atlantic Treaty Organization (NATO) lenisang, Jens Stoltenberg-i tanü Brehostibar nü metetdaktsüogo.

Russia-i Syria’er mangatetep ken o nung teka amoktsü tenzüka Syria nung tongpang raradaktsüba onük tongtipangsüa benoka jembitsü nükjidong nung Brussels yimti nung ayongba NATO defense ministertem senden nung shilem agiba sülen osangbener den tanü ajurutepdang Stoltenberg-i iba olen ya metetdaktsü.

Tan hopta nungi tenzüka Russia mitkar tayimtsütemi temelaba magi Turkey lushi temalen anüng nung ayimba osang jangjaba sülen Turkey densema, NATO nung züngsemba linüktemi Russia aitsütsü tenzükogo.

“NATO-i Turkey densema, NATO den sentaktepa aliba linük ajunga kümzüka ayutsü renema lir. Iba tangatetba nung ozü NATO mitkartem Turkey-i yokogo,” ta pai Stoltenberg-i ashi.

“Russia-i Syria nung lendong atalokdaktsüba Islamic State (IS) kiralongrar telok anema raratsü dak atemer Syria sorkar anemer amakba ajanga Syria nung taoba mapang nungi tensa tamajungba kümdaktsütsü. Ano, par mitkar tayimtsütemi temelaba magi Turkey lushi temalen ayimbajia khen yongi magizüktetba maparen ka lir,” ta pai shisem.

Paisa ashiba agi, tongpang raraba ajanga masü saka jembitepba yimtenren tebentetbaren bener aruba ajanga dang Syria indang mangatettep ken o bentetsütettsü.

US-i aniba alima teloktep mitkaremi Afghanistan nung Doctors Without Borders teloki ketdang asüba mozüki amakdang nisung 22 shi taoba hopta tepsetba den sentakba onüka tanü senden nung shilem agirtemi benoka jembiba osang jangjaogo.

“Alima teloktep mitkartemi tawa Afghanistan nung angati agi nüburtem tenzükba Doctors Without Borders teloki ketdang asüba mozükidang bomb tsükdakja lendong ataloktsüdakba den sentakba bushisüngdang agitsü onük benoktsü telemtetba ka tanü senden nung shilem agirtemi agiogo,” ta Stoltenberg-isa metetdaktsü.