Russia-i Syria yimjung mapatong nem tetsükdaktsü bener arutsür: Stoltenberg

Netherlands kübok Amsterdam nung European Union Defence Ministers senden amenba jakdang NATO Secretary General, Jens Stoltenberg (Tiyongtsü)-i osangbener den ajurutepba noksa nung angur. EU High Representative, Federica Mogherini aser Netherlands Defense Minister, Jeanine Hennis-Plasschaert nata Stoltenberg achijilen aser abelen nokdaka aliba noksa nung angur. (Amsterdam, February 05)

Amsterdam, February 05 (Agencies): Russia-i par mitkar tashi amshia Syria sorkar anemer amakba ajanga tang alima linüktemi tenzüka aliba Syria yimjung mapatong nem tetsükdaktsü bener arutsür ta shia, North Atlantic Treaty Organization (NATO) nung Secretary General, Jens Stoltenberg-i Russia tanü, Hokolbar nü aitsüogo.

“Russia-i par mitkar tayimtsü amshia Syria sorkar anemertem amakba ajanga Syria’er mangatettep ken o bentetja yimtenren tebentetbaren bener arutsütsü mapatong nem tetsükdakba tulu bener arutsür,” ta Netherlands kübok Amsterdam nung ayongba European Union (EU) defence ministers senden nung shilem agiba jakdang Stoltenberg-i sangoktsü.

Russia aser par linüki pusemba Syria Tir, Bashar al-Assad-i aniba Syria mitkartemi Aleppo nung sorkar anemer anema kanga sashia raratsü tenzükba ajanga United Nations (UN)-i ayonger Switzerland kübok Geneva nung amenba Syria yimjung sendena thinentsüsa akümba osang jangjaogo.

“Russia-i Syria sorkar pusema nungitba den külemi, Syria nung par mitkar tesepa tentetba ajanga Syria tensa tamajungba kümdaktsütsü tenzüka lir,” ta Stoltenberg-i ashi.

Tan February ita 25 nü nungi maneni tenzükshia amentsü renemba Syria yimjung senden den sentakba onüktem benoka jembitsü nükjidong nung UN Security Council-ia tanü senden ka ayonga amen.

Russia-i Syria sorkar anemertem amakba maparen anentsü takhangba ka Russia Foreign Minister, Sergei Lavrov den yashi, Brehostibar nü benokba osang ka US Secretary of State, John Kerry-ia metetdaktsüogo.

Ano külen, UN-i ayongba Donor Conference for Syria senden nung shilem agirtemi Syria nüburtem yaritsü teyari sen dollar sen billion 10 tashi agütsütsü asoshi yashi nangzüktepba osanga jangjaogo.