Russia-i Turkey anünglen ozüng alema benshiba ajanga NATO-i ozüng agütsü

Brussels/Istanbul, January 31 (Agencies): Russia nunger meyong raradang amshiba tayimtsü agi Turkey anünglen ozüng alema benshiba atema Russia ambassador jaoka Russia-i kanga tai benshiogo ta ashiba sülen NATO-ia Russia nem tarutsü nung yamaji mebenshitsü atema ozüng agütsüogo.
“Turkey nung aliba ketdangsertemi aiben shiaka Russia meyong raradang amshiba tayimtsü ka yashi, Honibarnü tashi mangai Turkey anünglen ozüng alema ia yima liasü,” ta Honibarnü NATO Secretary General Jens Stoltenberg-i sangdong ka ajanga metetdaktsü.
“Tesüiba mapang atalokba ajanga anünglen ozüng mebenshiba agi lendong ajuruba jangja metetogo,” ta pai ashi.
Pai Russia dang NATO-i lemteta yutsüba ama parnoki anünglen ozüng shitak benshitsü shiogo.
Turkey-a NATO den 1952 küm nungi züngsem ka aküm.
Stoltenberg-i Russia dang iba ama tashi mangaba mapa joko meinyaktsü metetdaktsüogo.
Ankara-i Moscow den chitepa jembiba nia pu asemer aser iba olemtep süngjema agitsü ajungshir, ta pai shisem.
Turkey Foreign Ministry-i Russian ambassador Ankara Hokolbar aonung jaoka Russia SU-34 tayimtsü-i ozüng alema aibelenba aija shiogo.
Hokolbarnü Turkey airforce-i Russia meyong tayimtsü nem Russia aser English oshi agi aiben ozüng agütsüogo ajisüaka parnoki manga aser tan aibelen ajanga parnoki Turkey aser NATO na ozüng mezüngshiba sayur, ta tezüluba sangdong ka nung shia lir.
Ozüng alema benshiba atema artsüdang, Russia-i, “Syrian Arab Republic nung Onok tayimtsütem ajanga Turkey anünglen ozüng alema kecha meinyak,” ta Russia Defense Ministry nung otongdar Igor Konashenkov-i osangbenertem dang ashi.
“Russia meyong Su-34 tayimtsü-i ozüng alema benshiogo ta Turkey-i sangdongbaji olulu lir,” ta Konashenkov-i ashi.
Turkey Tir Recep Tayyip Erdogan, “Russia nungeri ano Turkey anüng nung aibelenra lendong jaoker asütsü,” ta Honibarnü shiogo.
Item tatalokba ya NATO-i kanga junga reprangdar aser tan Russia-i kanga tim masüba mapa ka inyakogo ta pai aitsü.
“Iba ama tim masüba mapa ajanga NATO aser Russia na tsüngda tesendaktep mejungi akümba dang masü saka alima yimjung tsütsü mangatettep bener arutsü,” ta tir-i ashi.
Erdogan-i, “Ni Russia Tir Vladimir Putin ajuruteptsü kanga merangdanger saka majuruteter,” ta ashi.
November 24, 2015 nü Turkey airforce temi Russia indang jet ka kahzüka tsükdaktsüba sülen nungi linük ana tsüngda tesendaktep kanga majung aküm.