Russia-i Ukraine nunger osangbener ka pua lir

Moscow, October 3 (Agencies) : Hombarnü Russia nung Federal Security Service (FSB)-i, Kiev nung itdangiterba atema Ukraine nunger osangbener ka pua lir ta osang tejangja metetdaktsü.
FSB-ibo Ukraine nunger osangbener, Roman Suschenko ya Ukraine military intelligence service nung colonel lir ta ashir, ta EFE osang ajanga metetdaktsü.
Russian security agencies temi, Ukraine Ministry of Defence nung Chief Directorate of Intelligence nungi Suschenko ya itdangiter putettsü atema mita aoba mapang Moscow nung apu, ta ashiba osangbenertemi metetdaktsü.
Russia armed forces aser national guard inyakyim indang osang bendena linük lendongi yoktsüsa inyakba ajanga FSB-i Suschenko aitsü.
Russia nung bangdaktemi Suschenko-i linük nung arua itdangiterba atema pa anema ‘criminal investigation’ ka agitsü ozüng agütsüogo.
Arishi küm 47, Suschenko ya Ukraine National News Agency Ukrinform atema osangbener ka lir aser pa Hokolbarnü pua ayuba osang ya Russia nung NGO telok kati pa Moscow nung aliba Lefortovo tepuokdak ajuruba sülen ang temai adok.
Ukrinform-i Suschenko apuba osang tejangja agitepogo aser pa ya Moscow-i sodi amongi aoba lir ta parnoki ashi.
Suschenko ya Russia yimtiba, Moscow tongli apu, ajisüaka par kinunger mesüra Moscow nung aliba Ukraine embassy nem osang kecha magütsü aser ibaji international ozüng raksaba mapa lir, ta Ukrinform-i ashi.
Ukrinform-i Suschenko aputsü atema sentong yanglur liasü südi, ta ashidang, pa ya Ukrinform nung 2002 küm nungi inyaker aser 2010 küm nungi Ukrinform atema France nung osangbener inyaktsü tenzük, ta shisem.
Ukraine Verkhovna Rada (Parliament) nung First Deputy Chairman Iryna Gerashchenko-i iba osangbenersang tangsa tang chiokang ta shiogo.