Russia-i UN nungi tenangzükba akhanger

Moscow, November 12 (Agencies): Syria kübok Aleppo yimti anüdoklen alir nüburtem nem shitakbasa nungdakba teyari aser osettsüset tongtsütsü atema United Nations Mission in Syria (UNMS)-i nangzükba sülen ang mepetmesü adokba tesem nung tongpang rarabaren anenja, yimjung mapang lidaktsütsü renemba osang ka Russia’er defense ministry-i tanü, Honibar nü sangoktsüogo.
Syria Tir, Bashar al-Assad-i aniba Syria sorkar aser sorkar anemer na tsüngda tongpang kanga sashia raradak, Aleppo nung alir nüburtem nem nungdakba teyari osettsüset agütsüdaktsütsü aser tongpang nung yirurtem aniteta, parnok mozüki balala tongtsütsü nükjidong nung Russia-i ayonger külen Aleppo nung yimjung mapang tatsütsü lidaktsü saka sorkar anemertemi shinga majangdaktsüi nokdangba ajanga yimjung mapangji amajok kümdaktsüba osang bushiteta lir.
Ajisüaka, nübur aser teyari agütsürtem nokdangba maparenji parnoki masü saka Syria mitkar aser parnok nungiter mapa aliba olen ka sorkar anemertemi metetdaktsüogo.
“UNMS-i asangsang nung nungdakbapur nem teyari osettsüset tongtsütsü nangzükra, Aleppo nung yimjung mapang lidaktsütsü atema ozü Russia-i renema lir,” ta Russia defense ministry otongdar, Major-General Igor Konashenkov-i osang jangjashitsü.