Russia-i UN’er yimjung onük magizüker

Moscow, November 11 (Agencies): Syria kübok Aleppo yimti nung yimjung mapang talangba küma atsülangshitsütsü atema United Nations (UN)-i benokba yimjung onük magizüktsü lemtetba osang ka Russia’er defence ministry-i metetdaktsüogo.
Syria sorkar anemertemi agia aliba Aleppo yimti anüdoklen timtem toushi jenti ajurua alir nüburtem nem nungdakba teyari osettsüset tongtsütsü nükjidong nung iba tesem nung tongpang rarabaren anena, maneni yimjung mapang talangkba küma lidaktsütsü asoshi UN-i onük benok saka Russia-i tan iba onükji magizüker lir.
“UN-i nungitba aser Syria nung tentetba nübur yaritsü tentet, Jan Egeland teloki Aleppo yimti nung yimjung mapang talangba küma atsünglangshitsü atema onük benok saka iba tesem nung yimjung mapang talangba küma atsünglangshiba ajanga tajangzük kecha bener marutsütsü aliba yong ozü linüki iba yimjung onükji magizüktsü lemtetogo,” ta Russia’er defense ministry otongdar, Igor Koanshenkov-i osang jangjashitsü.
“Aleppo yimti anüdoklen alir nisung meyirijang 25,000 shi aya agi asütsüji shingaia memulunger,” ta shia, taoba ita 4 tashi tenokdangba benokba sülen Aleppo nung alirtem nem chiyongtsü aser mozümora densema, nungdakba teyari osettsüset tongtsüba osang ka Egeland telokia tan Brehostibar nü metetdakja liasü.
Russia linüki ayonger külen Syria Tir, Bashar al-Assad-i aniba Syria sorkar aser sorkar anemer na tsüngda tongpang rarabaren anena, Aleppo yimti nung mapang tatsütsü atema yimjung tezüngzüktep agidaktsüba osang bushiteta lir.
Russia-i taoba October ita anogo 3 tashi rarabaren anendaktsüba sülen tesüsa, tan November ita 4 nü Aleppo nung tongpang rarabaren ghonda 4 tashi anendaktsüba osang bushitetogo.