Russia-i UNHRC nung züngsemtsü temeten mangu

Geneva, October 29 (Agencies): Switzerland kübok Geneva nung tan Hokolbar nü amenba United Nations (UN) General Assembly senden nung Russia-i vote kanga ajema ngua, UN Human Rights Council (UNHRC) nung maneni züngsemtsü temeten mongutettsüsa jenjang tamajung ajuruogo.
Par linüki mitkar teyari agüja, Syria tongpang nung Syria sorkar yariba atema par linük merenshia, tan UNHRC nung maneni züngsemtsü temetenji mongudaktsüba osang angazükogo.
Yashi senden nung shilem agir General Assembly züngsem 193-i pei züngsem rong nungi züngsem 14 tashi linük 47 züngsemba UNHRC nung züngsemdaktsütsü atema shima liasü.
UNHRC ya alima ajunga nung meimchir nem pei temeten ngudaktsütsü aser kasaji kümzüka ayutsü atema inyakba UN tentet lir.
UNHRC nung regional menden 2 atema tokteper, Hungary-i vote 144 aser Croatia-i vote 114 ajangzükba yong vote 112 anguba Russia linüki tan UNHRC nung züngsemtsü temeten mongutettsüa aküm.
“Yashi vote kanga toktepa bendena liasü. Croatia aser Hungary nati temaba jenjang angu kechiyong par linük ana ya Russia ama alima jenjang nung yimtenren ken o balala benshiba linük masü,” ta Russia’er UN Ambassador, Vitaly Churkin-i tesülen metetdaktsü.
“Ozü Russia-i UNHRC nung küm aika züngsema aruogo aser tarutsü mapanga iba tentet nung züngsemtsü maongka angutsü imlar,” ta pai shisem.
Russia linük tanga UNHRC nung züngsema lir aser par kümsük taküm December ita 31 nü tembangtsü.
Syria Tir, Bashar al-Assad-i aniba Syria sorkar aser sorkar anemer na tsüngda küm 6 shi tongpang raradang Russia-i par mitkar tashi amshia, Syria sorkar pusema yariba ken o nung ajemdaker par Russia linük nem UNHRC nung maneni züngsemtsü temeten magütsütsü asoshi alima jenjang nung meimchir temeten atema nokdaker tentet 80 dak tema UN nung züngsemba linüktem ajungshiba osang angazükogo.
Hungary aser Croatia na dak alaka, United States, Egypt, Rwanda, Tunisia, Iraq, Japan, Saudi Arabia, China, South Africa, Britain, Brazil aser Cuba linüktem UNHRC nung züngsemdaktsütsü atema tan shimba osang jangjaogo.