Russia-i yangluba missile amshia, MH17 anüng nungi kazüka  yok

Nieuwegein, September 28 (Agencies): Russia-i yangluba Buk missile amshia, Malaysia’er MH17 tayimtsü Ukraine anüdoklen anüng nungi kazüka yokba kuli tejangja ngutetba osang ka international prosecutor-temi tanü, Bodbar nü metetdaktsüogo.

Netherlands senso timba densema, nisung 298 tashi aniba Malaysia Airlines flight 17 tayimtsüi Kuala Lumpur toktsür Amsterdam bushia aodang Ukraine sorkar anemertemi agia aliba tesemlen 2014 küm July ita anüng nungi kazüka yok aser tayimtsü nung amener nisung ajunga asü.

Russia-i yangluba missile amshia tayimtsü kazüka yok ta bushisüngdangertemi tan bushitetba ajanga Ukraine mitkartemi tayimtsüji anüng nungi kazüka yok asütsü akok ta Russia-ia toaba mapang metetdaktsüba osang olulu ka dang kümdaktsür lir.

Tayimtsü ken o nung ajemdaker prosecutor-temi okadak ken o mebenoktettsü saka tayimtsü tsükokdang asür kinüngrtemi tayimtsüji shironki anüng nungi kazüka yok ta osang metetnüa aliba yong tan tayimtsü kazüka yokba den sentakba osang alima dang metetdaktsüogo.

Ano, tan tayimtsü kazüka yokba osang jangjaba ajanga tarutsü anogotem nung asür kinüngertemi aibelener anema ken o benoktsü lenmang sadema lapoktsür lir.

“Russia nungi Ukraine kübok Pervomaysk yimtsüng tonga Buk missile bener aoba sülen kasaji amshia, Malaysia tayimtsü anüng nungi kazüka yok aser tesülen missile-ji tanaben Russia-i bener aoba kuli nguogo,” ta Netherlands, Australia, Belgium, Malaysia aserUkraine nungi temeyoktep sensotemi tentetba prosecutor-temi osang jangjashitsü.

Parnokisa ashiba agi, tanü tashi nung Buk missile amshia tayimtsü anüng nungi kazüka, yokba ken o nung aibelener nisung 100 shi bushiteta lir.

Dutch Safety Board-i tentetba bushisüngdang telok katia MH17 tayimtsüji Buk missile amshia, anüng nungi Ukraine anüdoklen kazüka yok ta yaküm, 2015 küm osang bushitet saka Russia-i pusemba Ukraine sorkar anemertemi tayimtsüji anüng nungi kazüka meyok ta Russia-i metenja liasü.