Russia, Iran aser Turkey linüktemi Syria ceasefire olemtep nungiter

Astana, January 24 (Agencies) : Mongulbarnü linük asem lungjemer Syria nung ceasefire inyakyim nungittsü aser Syria nung opposition danga Geneva nung yimjung olemtep akaba mapang adentsü shiogo, ta Russia, Iran aser Turkey linüktemi sangdongogo.
“January 23 nungi 24, 2017 tashi Astana nung ceasefire olemtep nung adentsü arua aliba Iran, Russia aser Turkey nungi yimsüsürtemi Syria sorkar aser sorkar anemer teloktem tsüngda tangatettep kati arudaktsütsü tenzüka inyakba nungiter,” ta olemtep tembangba sülen Kazakhstan Foreign Minister, Kairat Abdrakhmanov-i zünga metetdaktsüba sangdong nung shia liasü.
Moscow, Tehran aser Ankara-i Syria tebilemtsüji yimten ajanga mesüra sepai inyakyim agibo makoktsü ta angatetogo.
Item linük asem lungjemer Islamic State, Al Nusra front telungpur den raratsü mulungtepogo. Iba olemtep nung Al Nusra front telok indangbo benoka mejembi.
Linük asem yagi Syria tebilemtsü nung December 2015 nung lateta aliba, UN Security Council Resolution 2254 amshitsü pelashishia agizük.
February 8, 2017 nü Geneva nung akatsü lemteter senshiba olemtep sentong nung adentsü mulunga aliba sorkar anemer teloktem nungittsü, ta linük asemi metetdaktsü.