Russia lenir Putin tashi tuluba kümdar

Moscow, Metsüremi 11 (Agencies) : Russia Tir, Vladimir Putin-i yimten tashi amer küm ter ti yimsü süa arudagi aser taoba mapangtem dang nungi tang ya tashi taitba asünung pa atsüngdoktsüji tasak asütsü, ta osang ka ajanga metetdaktsüogo.
Tang tesüsaba 2012 küm Tir inyaktsü pa shimtetba sülen Russia nungertemi Ukraine amak, Crimea nunger atsüngdok, ongdang makai Syria lima nung bomb pokloktsü aser taoba US Tir election nung teka amuoka inyak ta parnok aitsür.
Tan ita tetenzüklento tawa tesüsaba raradang amshiba oset yanglua aliba nung Putin-i asüküma ashiba agi, “Shingaia onoki ashiba manga. Tangbo onoki ashiba nenoki angang.”
Pai alima matsüngdang Russia nunger melenshia akümba kuli sayuba, yimten tashi ajunga ka küma longjemdaktsüba aser pa anema nokdakertem tepuokdaki yokba amala maparen ajanga atangji March 18 nü Tir menden atema agishitsü aliba election nung Putin-i takok tulu angutsüji tejangja ta bilemdagi.
Vote noklang shilem nung 80 bosa pai angutsü ta Putin teimla tulu nung lir anungji pai pa ket nung aliba tashi amer Russia lima arakmoka yimsü asütsü ta bilemdagi.