Russia metro nung bomb lendong agütsür jangjaogo

Moscow, April 4 (Agencies) : St. Petersburgsia metro train nung bomb lendong kar ataloka nisung 11 tashi asüba dak sendakba nung temulung melemteti bilemba nisung Russia security service temi jangjaogo, ta Mongulbarnü metetdaktsü.
“Kiralongra mapatemji nisung kati inyak ta onoki jangjaogo,” ta Kyrgyzstan National Security Committee atema otongdar Rakhat Sulaimanov-i osangbenertem dang ashi.
Sulaimanov-i ashiba agi, tang temulung melemi alisang Akbarzhon Jalilov ya arishi küm 20 dak tera tema aser Central Asia nungi lir. Pa ket nung Russia senso indang kulia lir.
Sulaimanov-i, item bomb lendong atalokba bushisüngdangtsü asoshi Kyrgyzstan special service temi Russia den kanga junga angatettepa inyakdar, ta shisem.
Hombarnü memetetba oset ka metro train ka nung apok. Iba train ji Tekhnologichesky Institut Station nungi Sennaya Ploshchad Station-i aoerba liasü.
Russia Investigative Committee-i iba lendong ya kiralongra mapa lir ta aitsüogo.
Iba lendong nung nisung 51 tashi yiruogo, ta Russia Emergencies Ministry-i metetdaktsü.
St. Petersburg nung aliba ketdangsertemi item lendongtem nung asürtem nem akhümtsübu agüja anogo asemnü mang ayimtsü, ta osang ajanga metetdaktsü.
Tir Vladimir Putin-a lendong atalokba mapang yimti nung liasü aser paia Hombar nikongdang lendong atalokba tesemtem semdanga naro yutsüogo.