Russia mitkar tayimtsü 1 kazüka yok; 5 tsükset

Moscow, August 01 (Agencies): Russia mitkartemi ketdang asüba helicopter tayimtsü ka Syria northwest tsütsülen anüng tum nungi tanü, Hombar nü kazüka yokba sülen tayimtsü nung amener nisung 5 prongla tsüksetba osang ka Russia’er defense ministry-i metetdaktsüogo.
“Syria mitkartemi lungbanga aliba Aleppo yimti nung alir nüburtem nem nungdakba teyari osettsüset tongtsüba sülen ozü mitkar tesep bushia aodang tanü tayimtsüji kazüka yok. Tan lendong nung asür rong nung tyimtsü anishir 2 aser tena den yariteper nisung 3 tashi densemba osang jangjaogo,” ta ministry-i osang jangjashitsü.
“Tan tayimtsü kazüka yokba lendong nung densema ketdangser 5 prongla asüba osang defense ministry-i metetdaktsüogo. Tan lendong nung asürtemi asüdanga taküm kümzüktsü merangba osang angazükogo kechiyong parnoki tayimtsü ali nung tsükokdang nüburtem meyirutsütsü aser metepsettsü merangba osang jangjaogo,” ta Kremlin otongdar, Dmitry Peskov-ia metetdaktsü.
Yaküm, 2015 küm September ita nungi tenzüka, Syria Tir, Bashar al-Assad pusemer Russia mitkartemi par tayimtsü amshia, Syria sorkar anemer den tongpang raraba osang bushiteta lir.
Assad-i aniba Syria sorkar aser sorkar anemer telok na tsüngda mangatettep adoka tongpang joko küm 5 shi raraba osanga bushitetogo.
Ano külen, United Nations (UN)-i ayongba ama, Syria sorkari sorkar anemer den jilia takhangba kecha mebenoki yimjung senden Switzerland kübok Geneva nung tan August ita amentsü mulungba olen ka Syria sorkari yashi, Deobar nü metetdaktsüogo.
Taoba mapanga par telok ana tsüngda yimjung senden ishiben amenba osang bushitetogo saka tanü tashi par mangatettepbaren mebentetteti lir.