Russia mitkar tayimtsütemi Syria toktsütsü tenzüker

Moscow, March 15 (Agencies): Russia Tir, Vladimir Putin-i ozüng agütsüba sülen Syria nung yutsüba Russia mitkar tayimtsütemi Syria toktsür Russia bushia aotsü tenzükba olen ka Russia’er defense ministry-i tanü, Mongolbar nü sangoktsüogo.
Russia’er mitkar tayimtsütemi Syria Tir, Bashar al-Assad-i aniba mitkartem den yaritepa Syria nung taoba ita 5 ser tesadang ka shi tongpang raraba sülen tan Syria toktsütsü tenzüker lir.
“Ozü mitkar tayimtsütemi Syria anülulentip tsütsülen, Latakia province nung tentetba Hmeymim air base toktsür Russia bushia aotsü tenzükogo,” ta ministry-i osang jangjashitsü.
Syria nung tongpang takok ngua raraba sülen par mitkar telok tuluba ka Syria toktsütsütsü renemba osang ka Putin-ia yashi, Hombar nü metetdakja liasü.
“Tan Russia-i par mitkar tayimtsütem Syria nungi anitetadokba ya tongti mera agir lir,” ta shia, Russia mitkar tayimtsütemi Syria toktsüba ajanga yashi nungi tenzüka Switzerland kübok Geneva nung amenba Syria yimjung senden takok ngudaktsütsü imalaba olen ka United Nations (UN)’er Syria envoy, Staffan de Mistura-ia tanü metetdaktsüogo.
“UN-i ayonger Geneva nung Syria yimjung senden amenba den külemi, Russia-ia par mitkar tayimtsütem Syria nungi anitetadokba ajanga ajaki Syria nung tongpang rarabaren anenja par linük nung yimji yimjung lidaktsütsü merangba kuli angur,” ta United Nations Security Council (UNSC) Tir, Angola’er UN Ambassador, Ismael Gaspar Martins-ia pelaba olen ka lemsatep.
US Tir, Barack Obama-i Putin den yashi telephone ajanga Russia’er mitkar tayimtsütem Syria nungi anitettsü aser Syria nung yimtenren tebentetbaren bener arutsütsü den sentakba onük benoka jembiba sülen Russia-i tan par mitkar tayimtsütem Syria nungi anitetadoktsü tenzükogo ta White House-ia osang jangjashitsü.