Russia mitkartem ghonda ishika tsüngda nung Syria tonga yoktettsü: Putin

Moscow, March 17 (Agencies): Syria nungi Russia mitkartem anitetba maparen anogo 3 tsüngda nung tembangtsü alizüng ayuba osang ka Russia Tir, Vladimir Putin-i tanü, Brehostibar nü metetdaktsüogo.

“Syria nung yutsüba Russia mitkar aser mitkar tayimtsütem Syria nungi anitetba maparen anogo 3 shi nung tembangtsü renemogo. Ozü Russia-i Syria nung tensa tamajungba mekümdaktsütsü alizüng yua lir. Ajisüaka, nungdak dang adokra, ozü mitkartem ghonda ishika tsüngda nung Syria-i tanaben yoktettsü,” ta Putin-i sangoktsü.

Syria nung taoba ita 5 shi tongpang takok ngua rarar mitkar lenirtem nem naroküm agütsüba sentong ka tanü ayonga agidang Putin-i iba olenji metetdaktsü.

Ano, Syria Tir, Bashar al-Assad-i aniba Syria sorkar aser sorkar anemertemi par tongpang rarabaren anena yimjung tezüngzüktep asangsang nung agitsü imlaba olen ka pai lemsatep.

Russia-i par mitkar züngsem 6000 shi Syria nung yutsüba osang ka United States-ia metetdaktsüogo.

Russia-i Syria nung tentetba mitkar tayimtsü aser mitkar rong anendak maneni ketdangsüa par mitkar tayimtsütem amshia Islamic State (IS), al Qaeda aser al-Nusra Front densema, United Nations (UN)-i kiralongrar aser telungpur telok ta züngokba teloktem anema maneni raratsü renemba osang ka Putin-i metetdaktsü.

Ano külen, küm 6 tejaklen nungi tenzüka nisung 300,000 dak tema tepseta Syria nung mangatettep tulu adoka tongpang rarabaren anenja mangatettep adokba teloktem rong nung yimjung tezüngzüktep agidaktsütsü nükjidong nung UN-i ayonger külen Switzerland kübok Geneva nung tang yimjung senden temendak aliba osang jangjaogo.

Tan amenba yimjung senden takok ngua amentsü nükjidong nung Syria sorkar aser sorkar anemer na tsüngda tawa yimjung tezüngzüktep agiba sülen Syria nung taoba mapang amabo tongpang meraraba osanga bushiteta lir.