Russia mitkartemi Islamic State telok anema raratsüla: Hollande

Tawa Syria nung tesep tentetba Russia mitkartemi par tayimtsü amshia Syria sorkar anemertemi Damascus yimti nung tentetba tesep ka amakba sülen Syria sorkar anemertemi lendong atalokdak mapa inyakba noksa nung angur. (Damascus, October 03)

 Paris, October 03 (Agencies): Tang Syria-i yoka aliba Russia mitkartem nem Islamic State (IS) kiralongrar telok den dang raradaktsütsü olen ka France Tir, Francois Hollande-i tanü Honibar nü metetdaktsüogo.

Russia mitkartemi par mitkar tayimtsü amshia Syria nung tentetba IS telok anema raratsü tatemtsü bener tanü agi anogo tasembuba tashi Syria sorkar anemer amakba maparen inyakba osang bushiteta lir.

“Russia mitkartemi Syria Tir, Bashar al-Assad-i aniba Syria sorkar anemertem anema raratsü tenzükba ajanga taoba küm 4 tejaklen nungi tenzüka Syria sorkar aser sorkar anemer na tsüngda mangatettep adoka tongpang rarabaren tamajungba kümdaktsütsü,” ta Hollande-i Russia Tir, Vladimir Putin den Paris yimti yashi, Hokolbar nü ajurutepdanga metetdakja liasü.

US-i aniba alima teloktep mitkartem nema IS telok dak alaka Syria sorkar anemertem denbo tongpang meraratsü ozüng agütsüba olen ka France, Turkey, US, Germany, Qatar, Saudi Arabia aser Britain lenirtemi metetdaktsüogo.

“Russia-i akidang nungi tenzüka Syria’er ken o nung teka amoka lir. Aji oda, Russia sorkari Assad-i aniba sorkar pusema par mitkartem nem tongpang nung amshitsü osettsüset agüja yariba osang tejangja bushiteta lir. Ajisüaka, Syria sorkar jenjang tajungba kümdaktsütsü nükjidong nung par mitkartemi sorkar anemer amaktsü tenzükba maparen ya tim masü aser kasaji anenadoktsüla,” ta Hollande-i nenshia ashi.

“Syria-i tang ajurushia aliba mangatettep ken o bentettsü asoshi yimtenren tebentetbaren nungdaka lir. Ajisüaka, Russia-i tang Syria’er tongpang rarabaren nung tongti shilem agitsü tenzükba ajanga Syria indang ken o ji taoba mapang nungi tang tamajungba kümdaktsütsü ana nung lir,” ta pai metetdaktsü.

Ano külen, “Russia-i kiralongrar aser Syria sorkar anemer na tsüngda mebendangteter,” ta shia, par mitkartemi Syria sorkar anemer anema raraba ajanga par linük ana indang mitkartem tsüngda tongpang raratsüsa akümtsü akok ta US Tir, Barack Obama-ia Washington nungi tanü metetdaktsüogo.