Russia nagmati atuba tesem apokdang nisung trok pokset

Feb. 26, 2016 : Vorkuta, Komi republic city, Russia nung Severnaya nagmati atuba tesem nung rescue mapa inyakertem noksa ka yangi angur.

Moscow, February 28 (Agencies) : Russia nung Deobarnü nagmati atuba tesem ka apokba mapang nisung trok poksetogo, ta linük emergency ministry ajanga metetdaktsü.
Iba tesem nung tan amai lendong ka ataloka nakmati atur nisung pezü asü aser toku yiruba sülen anogo ka lir Deobarnü iba lendong ya atalokerba lir.
Deobarnü Komi republic, Vorkuta, Severnaya nagmati atuba tesem nung lendong atalokba mapang nagmati atuba ongken telung nungji nisung 77 shi ia liasü. Parnok 77 rongnung nisung 38 bo nisung bushiba nung yaritepertem aser tanüngba 39 ji nagmati aturtem liasü, ta Tass news agency ajanga metetdaktsü.
Osang ajanga ashiba agi, iba lendong nung nisung trok süogo. Tasür trok rongnung pongubo ‘Russian ministry for emergency situations’ nungi rescue mapa inyakertem liasü, ta kasa osang ajanga shisem.
Kasa lendong nung nisung pongu yiru aser parnok ajak temai anitetogo. Severnaya mine nung inyaker doctor temi parnok anepaludar, ta emergencies ministry sangdong ka ajanga metetdaktsü.
Tajemba agi nagmati atur parnok nisung 26 ano mangu bushidar aser parnok taküm kümzüktsüji lenmang kanga sademabo mali, ta ministry osang ajangasa ashi.