Russia nung BRICS senden amentsü tenzüker

(Abelen nungi achijileni tarensa) Russia Tir, Vladimir Putin; India Ato Kilonser, Narendra Modi; Brazil Tir, Dilma Rousseff aser China Tir, Xi Jinping nungeri Russia kübok Ufa yimti nung ayongba BRICS senden indang plenary session nung shilem agitsü asoshi senden amendaki aodang agiba noksa ka yangi angur. (Ufa, July 09)

Ufa, July 09 (Agencies): BRICS ta ajaba Brazil, Russia, India, China aser South Africa linük nungi lenirtemi kümshi amenba BRICS senden Russia kübok Ufa yimti nung tanü Brehostibar nü nungi amentsü tenzükogo.
International Monetary Fund (IMF) den temaba jenjang ngutettsü nükjidong nung BRICS teloki US nunger dollar sen billion 100 tashi parnok rong nungi saruteper nungdakba maparen inyaktsü renemba osang jangjaogo.
Iba senji amshia, BRICS New Development Bank-i BRICS nung züngsemba linük 5 nung nungdakba ki o jen renemtsü mapatong balala taruba 2016 küm inyakdaktsütsü renemogo.
BRICS lenirtemi tanü ajurutepa senden amenba jakdang, par linük 5 nungi ketdangsertemi tan Mongolbar nütu ajurutepa pei linük nem atazüktsüba sen arok senpong nung enoktsütsü asoshi mapang jilia renemba osanga jangjaogo.
BRICS nung züngsemba linük 5 ya tang sabang balala nung terenlok tulu ngua rongsenren jenjang tajungba akümba linüktem lir.
Tanü senden nung Russia Tir, Vladimir Putin; China Tir, Xi Jinping; Brazil Tir, Dilma Rousseff; India Ato Kilonser, Narendra Modi aser South Africa Tir, Jacob Zuma nungeri shilem agia liasü.